Asian Games: सरबजोत आणि दिव्याने १० मीटर एअर पिस्तूल मिश्र सांघिक स्पर्धेत रौप्यपदकावर कोरले नाव

१० मीटर एअर पिस्तूल मिश्र सांघिक स्पर्धेत यजमान चीन पहिल्या क्रमांकावर राहिला आणि सुवर्णपदक जिंकले. भारताने १४ तर चीनने १६ गुण मिळवले. सातव्या दिवशी भारताचे हे पहिले पदक ठरले. आतापर्यंत भारताच्या खात्यात ३४ पदके जमा झाली आहेत. भारताच्या खात्यातील हे एकूण १३ वे रौप्य पदक ठरले. याशिवाय भारतीय संघाने ८ सुवर्ण आणि १३ कांस्यपदकेही जिंकली आहेत.

नेमबाजीतील भारताची आतापर्यंतची कामगिरी –

भारताला पहिले सुवर्णपदक नेमबाजीत मिळाले होते. आतापर्यंत भारताने नेमबाजीत १९ पदके जिंकली असून त्यात ६ सुवर्ण, ८ रौप्य आणि ५ कांस्य पदकांचा समावेश आहे. भारतीय नेमबाज सातत्याने चमकदार कामगिरी करत आहेत. आशियाई क्रीडा स्पर्धेत नेमबाजीत भारताची ही सर्वोत्तम कामगिरी ठरली आहे.

हेही वाचा – World Cup 2023: भारत आणि इंग्लंड संघात आज रंगणार सराव सामना, जाणून घ्या कधी आणि कुठे पाहता येणार लाइव्ह स्ट्रिमिंग

लांब उडीतही भारताकडून पदकाची अपेक्षा –

त्याचबरोबर लांब उडीतही भारताकडून पदकाची अपेक्षा आहे. भारतीय खेळाडू मुरली श्रीशंकरने लांब उडीच्या अंतिम फेरीत स्थान निश्चित केले आहे. अंतिम फेरीसाठी पात्र होण्यासाठी मुरलीला ७.९० मीटर लांब उडी आवश्यक होती, परंतु त्याने ७.९७ मीटरच्या लांब उडीसह अंतिम फेरीत आपले नाव नोंदवले. हा आकडा त्याने पहिल्याच प्रयत्नात गाठला होता.