आयपीएलच्या बाराव्या हंगामात चेन्नई सुपरकिंग्ज संघाचा रथ पुन्हा एकदा विजयपथावर लागला आहे. घरच्या मैदानावर खेळत असताना चेन्नईने पंजाबवर 22 धावांनी मात केली. 161 धावांचं आव्हान घेऊन मैदानात उतरलेला पंजाबचा संघ 138 धावांपर्यंतच मजल मारु शकला. चेन्नईचा या हंगामातला हा चौथा विजय ठरला आहे.
161 धावांचं आव्हान घेऊन मैदानात उतरलेल्या पंजाबची सुरुवात खराब झाली. भरवशाचा ख्रिस गेल झटपट माघारी परतला. यानंतर मयांक अग्रवालही हरभजन सिंहच्या गोलंदाजीवर माघारी परतला. मात्र यानंतर लोकेश राहुल आणि सरफराज खान यांनी अर्धशतकी भागीदारी करत संघाचा डाव सावरला. या खेळीदरम्यान दोघांनीही आपलं अर्धशतक पूर्ण केलं. मात्र मोक्याच्या षटकांमध्ये धावगती वाढवणं त्यांना जमलं नाही.
याचाच परिणाम म्हणजे, अखेरच्या 4 षटकांमध्ये पंजाबसमोरचं आव्हान वाढलं. त्यातचं चेन्नईच्या गोलंदाजांनी अखेरच्या षटकांत टिच्चून मारा करत पंजाबच्या फलंदाजांना मोठे फटके खेळण्याची संधी दिली नाही. लोकेश राहुल मोठा फटका खेळण्याच्या नादात माघारी परतला. 19 व्या षटकात दिपक चहरने सुरुवातीच्या दोन चेंडूवर स्वैर मारा करत चिंतेचं वातावरण निर्माण केलं. मात्र त्यानंतर जोरदार पुनरागमन करत दिपकने डेव्हिड मिलरचा त्रिफळा उडवला.
यानंतर विजयासाठी आवश्यक असलेल्या 26 धावा पूर्ण करणं पंजाबला जमलं नाही. अखेरीस चेन्नईने 22 धावांनी विजय मिळवत स्पर्धेत दणक्यात पुनरागमन केलं. चेन्नईकडून हरभजन सिंह आणि स्कॉट कुगलेजीनने प्रत्येकी 2-2, तर दिपक चहरने 1 बळी घेतला.
याआधी,पंजाबच्या गोलंदाजांनी टिच्चून केलेल्या माऱ्यामुळे पंजाबने चेन्नई सुपरकिंग्जला 160 धावांवर रोखण्यात यश मिळवलं. चेन्नई सुपरकिंग्जने घरच्या मैदानावर सामना खेळत असताना नाणेफेक जिंकून प्रथम फलंदाजी करण्याचा निर्णय घेतला. शेन वॉटसन आणि फाफ डु प्लेसिस यांनी आश्वासक भागीदारी करुन दिली. मात्र रविचंद्रन आश्विनने शेन वॉटसनला माघारी धाडत चेन्नईला धक्का दिला.
यानंतर पंजाबच्या सर्व गोलंदाजांनी चेन्नईच्या फलंदाजांवर अंकुश लावला. डु प्लेसिस, सुरेश रैना देखील आश्विनच्या फिरकीचे शिकार होऊन माघारी परतले. यानंतर अंबाती रायुडू आणि महेंद्रसिंह धोनीने अखेरच्या षटकांत फटकेबाजी करत संघाला 150 धावांचा पल्ला गाठून दिला. पंजाबकडून कर्णधार रविचंद्रन आश्विनने 3 बळी घेतले.
किंग्ज इलेव्हन पंजाबवर 22 धावांनी केली मात
कुगलेजीनने घेतला बळी
दिपक चहरने उडवला मिलरचा त्रिफळा, पंजाबला चौथा धक्का
पंजाबचा डाव सावरला, सामना रंगतदार अवस्थेत
उंच फटका खेळण्याचा प्रयत्न करणाऱ्या मयांक अग्रवाल डु प्लेसिसकडे झेल देऊन माघारी
हरभजनसिंहच्या गोलंदाजीवर धोनीने घेतला झेल
अखेरच्या षटकांमध्ये चेन्नईच्या फलंदाजांची फटकेबाजी
रैना त्रिफळाचीत होऊन माघारी, चेन्नईचा तिसरा गडी बाद
रविचंद्रन आश्विनला सामन्यात दुसरा बळी
रविचंद्रन आश्विनच्या गोलंदाजीवर मोठा फटका खेळण्याच्या नादात वॉटसन सॅम कुरनकडे झेल देत माघारी
पहिल्या विकेटसाठी दोघांमध्ये 56 धावांची भागीदारी
चेन्नईच्या संघात महत्वाचे 3 बदल