LSG vs RCB Highlights: जितेश शर्माच्या खेळीसह आरसीबीचा लखनौवर विजय, बंगळुरू टॉप-२ मध्ये

१७व्या षटकातील पहिल्याच चेंडूवर जितेश शर्माला दिग्वेश राठीने झेलबाद केलं. पण बॅकफूट नो बॉलमुळे जितेश नाबाद राहिला आणि त्याने फ्रीहिटवर षटकार खेचत आपलं अर्धशतक पूर्ण केलं.

१२ व्या षटकात आवेश खानने दुसऱ्या चेंडूवर विराट कोहलीला झेलबाद केलं. विराट कोहली मोठा फटका खेळण्याच्या प्रयत्नात सीमारेषेजवळ झेलबाद झाला. विराटने ३० चेंडूत १० चौकारांसह ५४ धावा केल्या. यासह आरसीबीने १२ षटकांत ४ बाद १३२ धावा केल्या आहेत. यासह आरसीबीला विजयासाठी ४८ चेंडूत ९६ धावांची गरज आहे.

आरसीबीला विल्यम ओरूकने आठव्या षटकात दोन मोठे धक्क दिले आहेत. षटकातील पाचव्या चेंडूवर रजत पाटीदार झेलबाद झाला. तर अखेरच्या चेंडूवर नुकताच आलेला लियाम लिव्हिंगस्टोन गोल्डन डकवर पायचीत होत बाद झाला. यासह आरसीबीने ८ षटकांत ३ बाद ९० धावा केल्या आहेत.

विराट कोहली आणि फिल सॉल्ट यांनी पॉवरप्लेमध्ये चांगली सुरूवात करत आरसीबीला चांगली सुरूवात करून दिली आहे. ५ षटकांत दोघांनी मिळून ६० धावा केल्या.

ऋषभ पंतने अखेरच्या सामन्यात ६१ चेंडूत ११८ धावांची धुव्वाधार खेळी करत धावांचा दुष्काळ संपवला. पंतने वादळी खेळी करत लखनौला धावांचा डोंगर उभारून दिला. याशिवाय पंतने मार्शबरोबर १५२ धावांची भागीदारी रचत आरसीबीच्या गोलंदाजांची धुलाई केली. लखनौने यासह २० षटकांत ३ विकेट्स गमावत २२७ धावा केल्या आहेत. आऱसीबीला या महत्त्वाच्या सामन्यात विजयासाठी लखनौने २२८ धावांचं मोठं आव्हान दिलं आहे.

ऋषभ पंतनंतर आता संथ सुरूवात केलेल्या मिचेल मार्शने अखेरीस ३१ चेंडूत ४ चौकार आणि ३ षटकारांसह ५३ धावा करत अर्धशतक झळकावलं. यासह त्याने यंदाच्या मोसमातील आपल्या ६०० अधिक धावांचा टप्पा गाठला आहे.

ऋषभ पंतने आरसीबीविरूद्धच्या लीग टप्प्यातील अखेरच्या सामन्यात शानदार फलंदाजी करत आपला फॉर्म दाखवून दिला. ऋषभ पंतने या सामन्यात २९ चेंडूत ५ चौकार ३ षटकारांसह ५२ धावा करत वादळी अर्धशतक झळकावलं. यासह १० षटकांत लखनौने १ बाद १०० धावा केल्या आहेत.

आरसीबीविरूद्ध पहिली विकेट गेल्यानंतर ऋषभ पंत तिसऱ्या क्रमांकावर फलंदाजीसाठी आला. त्याने येताच यश दयालच्या चौथ्या षटकात वादळी फटकेबाजी केली. पंतने २ चौकार आणि एका षटकारासह १८ धावा कुटल्या आणि संघाला ४४ धावांचा टप्पा गाठून दिला.

लखनौ सुपर जायंट्स वि. रॉयल चॅलेंजर्स बंगळुरू यांच्यातील सामन्याला सुरूवात झाली आहे. लखनौकडून नवा खेळाडू सलामीला उतरला आहे, मॅथ्यू ब्रिटझके आणि मिचेल मार्शची जोडी उतरली आहे. पहिल्या षटकात २ चौकारांसह लखनौने बिनबाद ११ धावा केल्या आहेत.

मिचेल मार्श, मॅथ्यू ब्रेट्झके, निकोलस पूरन, ऋषभ पंत (कर्णधार/विकेटकिपर), आयुष बडोनी, अब्दुल समद, हिम्मत सिंग, शाहबाज अहमद, दिग्वेश सिंग राठी, आवेश खान, विल्यम ओरुक

आयपीएल २०२५ च्या लीग टप्प्यातील आज अखेरचा सामना खेळवला जाणार आहे. हा सामना रॉयल चॅलेंजर्स बंगळुरू वि. लखनौ सुपर जायंट्स यांच्यात लखनौच्या घरच्या मैदानावर होणार आहे. दोन्ही संघांचा हा अखेरचा सामना असून आरसीबीला या सामन्यात विजय अनिवार्य आहे.