Dream11 IPL 2020 MI vs RR Live Updates: राजस्थानविरूद्धच्या सामन्यात मुंबईच्या संघाने ५७ धावांनी दणदणीत विजय मिळवला. प्रथम फलंदाजी करताना सूर्यकुमार यादवने ठोकलेल्या नाबाद ७९ धावांच्या बळावर मुंबईच्या संघाने राजस्थानला १९४ धावांचे लक्ष्य दिले होते. या लक्ष्याच्या पाठलाग करताना जोस बटलर वगळता इतर कोणत्याही फलंदाजाला चांगली खेळी करता आली नाही. बटलरने झुंजार ७० धावांची खेळी केली तर जसप्रीत बुमराहने २० धावांत ४ बळी टिपले. सूर्यकुमार यादवला सामनावीर घोषित करण्यात आले.
१९४ धावांच्या आव्हानाचा पाठलाग करताना राजस्थानची सुरूवात खूपच खराब झाली. यशस्वी जैस्वाल, कर्णधार स्टीव्ह स्मिथ, संजू सॅमसन आणि महिपाल लोमरोर हे स्वस्तात बाद झाले. पण बटलरने एक बाजू लावून धरत अर्धशतक केले. हे त्याचे १०वे IPL अर्धशतक ठरले. याचसोबत त्याने स्टीव्ह स्मिथ, महेला जयवर्धने आणि कुमार संगकारा यांच्या कामगिरीशी बरोबरी साधली. या दिग्गज खेळाडूंच्या नावावरदेखील १० IPL अर्धशतके आहेत.
दरम्यान, दमदार खेळ करत असताना बटलरने मोठा फटका खेळला आणि पोलार्डने त्याचा अप्रतिम झेल टिपला. बटलरने ४७ चेंडूत ४ चौकार आणि ५ षटकारांसह ७० धावा केल्या. पण त्याच्यानंतर राजस्थानच्या संघाची धूळधाण उडाली आणि १३६ धावांत संपूर्ण संघ तंबूत परतला. जसप्रीत बुमराहने सर्वाधिक ४ बळी टिपले.
तत्पूर्वी, रोहित शर्मा-क्विंटन डी कॉक जोडीने तुफान फटकेबाजी करत चांगली सुरूवात केली होती, पण डी कॉक २३ धावांवर बाद झाला. रोहितही ३५ धावा काढून माघारी परतला. पुढच्याच चेंडूवर इशान किशनही बाद झाला. कृणाल पांड्याला लवकर फलंदाजीस पाठवण्यात आले, पण तो १७ चेंडूत १२ धावा करून माघारी परतला. एकीकडे गडी बाद होताना सूर्यकुमार यादवने मात्र एक बाजू लावून धरत झुंजार अर्धशतक ठोकलं. सूर्यकुमार यादव आणि हार्दिक पांड्या या जोडीने शेवटपर्यंत तळ ठोकत मुंबईला १९३ धावांपर्यंत मजल मारून दिली. सूर्यकुमारने ११ चौकार आणि २ षटकारांच्या मदतीने नाबाद ७९ धावा केल्या.
