IPL इतिहासातील ‘नर्व्हस ९९’; शतकाच्या उंबरठ्यावर असताना ‘या’ फलंदाजांना दाखवला पॅव्हेलियनचा रस्ता

आयपीएलमध्ये अनेक खेळाडू ‘नव्हर्स ९९’ चा शिकार झाले आहेत. टूर्नामेंटच्या इतिहासात आतापर्यंत फक्त ५ खेळाडू असे आहेत, जे ९९ धावांवर असताना बाद झाले आहेत. विराट कोहली आयपीएलमध्ये ९९ धावांवर बाद होणार पहिला खेळाडू आहे. विराटने आयपीएल २०१३ मध्ये दिल्ली टीमच्या विरोधात ५८ चेंडूत १० चौकार आणि ४ षटकारांच्या मदतीने ९९ धावांची खेळी केली होती. त्यावेळी शतकासाठी फक्त एका धावेची गरज असताना विराट कोहली धावबाद झाला होता.

नक्की वाचा – कुणी घेतला पहिला विकेट? कोणता फलंदाज झाला बाद? कधी रंगला पहिला सामना? जाणून घ्या ‘IPL’चा इतिहास

दिल्ली कॅपिटल्सचा फलंदाज पृथ्वी शॉ आयपीएल २०१९ मध्ये ९९ धावांवर बाद झाला होता. त्याने कोलकाता नाईट रायडर्सच्या विरोधात ५५ चेंडूंचा सामना करत ९९ धावांची आक्रमक खेळी केली होती. युनिवर्स बॉस म्हणजेच ख्रिस गेल आयपीएल २०२० मध्ये ९९ धावांवर असताना बाद झाला होता. पंजाबकडून खेळताना गेलने राजस्थान रॉयल्स विरोधात झालेल्या सामन्यात ६३ चेंडूत ६ चौकार आणि ८ षटकार ठोकत ९९ धावा केल्या होत्या. गेलला जोफ्रा आर्चरने क्लीन बोल्ड केलं होतं.

तसंच आयपीएल २०२० मध्ये मुंबई इंडियन्सचा फलंदाज इशान किशनचंही एका धावेमुळं शतक हुकलं होतं. इशानने आरसीबी विरुद्ध ५८ चेंडूत २ चौकार आणि ९ षटकार ठोकून ९९ धावा केल्या होत्या. चेन्नई सुपर किंग्जचा फलंदाज ऋतुराज गायकवाडही आयपीएल २०२२ मध्ये ९९ धावांवर बाद झाला होता. त्याने सनरायजर्स हैद्राबाद विरुद्ध झालेल्या सामन्यात ५७ चेंडूत ९९ धावा कुटल्या होत्या. त्याने या इनिंगमध्ये ६ चौकार आणि ६ षटकार ठोकले होते. टी नटराजनच्या गोलंदाजीवर ऋतुराज बाद झाला होता.