भारताचा एकदिवसीय क्रिकेट कर्णधार महेंद्रसिंह धोनीला अलीकडेच मानद लेफ्टनंट कर्नल सन्मान दिला असतानाच त्याच्या इच्छेनुसार आता त्याला आग्रा येथील पॅरा रेजिमेंट येथे दोन आठवडय़ांचे प्रशिक्षण देण्यात येत आहे. धोनीने स्वत:च आपल्याला प्रशिक्षण मिळावे अशी विनंती लष्करी अधिकाऱ्यांना पत्र लिहून केली होती. त्यानुसार त्याला परवानगी दिल्यानंतर तो ५ ऑगस्टला पॅरा ट्रेनिंग स्कूल येथे दाखल झाला. क्रिकेट सोडल्यानंतर लष्करात सक्रिय होण्याची इच्छाही त्याने व्यक्त केली होती. दोन आठवडय़ांच्या प्रशिक्षणानंतर तो पॅराशूट भरारीचे उद्दिष्ट पूर्ण करणार असल्याचे संरक्षण मंत्रालयाचे प्रवक्ते सीतांशु कार यांनी सांगितले. धोनीला २०११ मध्ये पॅराशूट रेजिमेंटकडून ‘मानद लेफ्टनंट कर्नल’ किताब देण्यात आला होता.