विराटनं टेस्ट कॅप्टनशिप सोडली अन् धोनीची ‘ती’ भविष्यवाणी ठरली खरी!

पुण्यात मर्यादित षटकांच्या कर्णधारपदाचा त्याग केल्यानंतर पहिल्या पत्रकार परिषदेत धोनी म्हणाला होता, “भारतात विभाजित कर्णधारपद चालत नाही. माझ्यासाठी पुढे जाण्याची हीच योग्य वेळ होती. विराट कोहलीच्या नेतृत्वाखाली भारतीय संघ आतापर्यंतचा सर्वात यशस्वी संघ ठरणार आहे.”

२०१५च्या शेवटी आणि दक्षिण आफ्रिकाविरुद्ध घरच्या वनडे मालिकेतील पराभवापूर्वी, जेव्हा धोनीच्या नेतृत्वावर जोरदार टीका झाली होती, तेव्हा त्याला हे समजले होते की विभाजित कर्णधारपदाची संकल्पना भारतात काम करत नाही. धोनी म्हणाला होता, “मी विभाजित कर्णधारपदावर विश्वास ठेवत नाही. संघासाठी एकच कॅप्टन असावा. भारतात विभाजित कर्णधारपद चालत नाही, मी योग्य वेळेची वाट पाहत होतो. विराट कामात सहज असावा अशी माझी इच्छा होती. त्यात कोणताही चुकीचा निर्णय नाही. या संघात तिन्ही फॉरमॅटमध्ये चांगली कामगिरी करण्याची क्षमता आहे. मला वाटले की पुढे जाण्याची हीच योग्य वेळ आहे.”

हेही वाचा – “शेवटी धोनीचे खूप आभार, ज्यानं…”, टेस्ट कॅप्टनशिप सोडणाऱ्या विराटनं पोस्टमध्ये केला ‘कॅप्टन कूल’चा उल्लेख!

२०१४-१५मध्ये ऑस्ट्रेलियातील कसोटी मालिकेदरम्यान धोनीच्या अचानक निवृत्तीनंतर विराट कोहली कसोटी कर्णधार झाला. यामुळे विभाजित कर्णधारपदाचा मार्ग मोकळा झाला, परंतु त्यानंतर लहान फॉरमॅटमध्ये भारताला अनुकूल निकाल मिळाले नाहीत. २०१५चा वऩडे आणि २०१६चा टी-२० वर्ल्डकप भारताने गमावला.