मुंबईचा ६०३ धावांचा डोंगर

त्यानंतर आलेल्या सिद्धेश लाडने यादवला साजेशी साथ दिली. दोघांनी अर्धशतकी भागीदारी करून संघाला पाचशेचा पल्ला पार करून दिला. मात्र, खेळपट्टीवर नांगर रोवून बसलेल्या यादवला जयंत यादवने बाद केले. त्याने २७१ चेंडूंत २४ चौकार व १ षटकार खेचून १५६ धावा केल्या. त्यानंतर लाडने चिवट खेळ करत संघाला सहाशेचा पल्ला पार करून दिला. लाडने आठव्या विकेटसाठी इक्बाल अब्दुल्लासह ४६ धावांची महत्त्वपूर्ण भागीदारी केली. लाड ६६ धावांवर जयदेव उनाडकटच्या गोलंदाजीवर माघारी परतला. त्यानंतर शेष भारताने तळाच्या फलंदाजांना गुंडाळून मुंबईचा डाव ६०३ धावांवर संपुष्टात आणला. शेष भारताकडून जयंत यादवने सर्वाधिक ४ बळी टिपले.
६०३ धावांच्या आव्हानाचा पाठलाग करताना शेष भारताला अवघ्या २९ धावांवर पहिला धक्का बसला. अभिषेक नायरने सलामीवीर श्रीकर भारतला वैयक्तिक १६ धावांवर असताना बाद केले. दिवसअखेर फजल व जयंत यादवने किल्ला लढवत शेष भारताला १ बाद ३६ धावा करून दिल्या आहेत.

संक्षिप्त धावफलक
मुंबई : ६०३ (अखिल हेरवाडकर ९०, जय बिस्ता १०४, सूर्यकुमार यादव १५६, आदित्य तरे ६५, सिद्धेश लाड ६६; जयंत यादव ४-१३२) विरुद्ध शेष भारत : १ बाद ३६ (फैज फजल खेळत आहे १८, जयंत यादव खेळत आहे १).