नीरज चोप्राच्या शिरपेचात मानाचा तुरा! ८८.१६ मीटर थ्रोसह जिंकली पॅरिस डायमंड लीग

यंदाच्या पॅरिस डायमंड लीग स्पर्धेत जूलियन वेबरने नीरजला कडवं आव्हान दिलं होतं. मात्र, नीरजने त्याच्या पहिल्याच प्रयत्नात ८८.१६ मीटर भालाफेक करून (थ्रो) त्याचं वर्चस्व सिद्ध केलं. या थ्रोमुळे नीरज सुरुवातीपासूनच आघाडीवर होता. नीरजची आघाडी इतर कोणत्याही खेळाडूला मोडून काढता आली नाही.

नीरजने वचपा काढला

या विजयासह नीरजने जर्मनीचा अव्वल भालाफेकपटू जूलियन वेबरचा वचपा काढला आहे. कारण वेबरने डायमंड लीगच्या दोहा लेगमध्ये नीरजला पराभूत केलं होतं. मात्र पॅरिसमध्ये नीरजने वेबरला मागे टाकत ही स्पर्धा जिंकली आहे.

जूलियन वेबरने ८७.८८ मीटर थ्रो करून द्वितीय क्रमांक पटकावला. तर, ब्राझीलच्या लुइस मॉरिसियो दा सिल्व्हाने ८६.६२ मीटरपर्यंत भाला फेकून तिसरं स्थान पटकावलं आहे. मागील तीन स्पर्धांमध्ये पहिल्यांदाच नीरजने वेबरचा पराभव केला आहे. सध्याच्या डायमंड लीग हंगामाचा अंतिम सामना २७-२८ ऑगस्ट रोजी स्वित्झर्लंडच्या झ्युरिक शहरांत खेळवला जाईल.

नीरजचा प्रतिस्पर्धी अँडरसन पीटर्सची सुमार कामगिरी

दरम्यान, डायमंड लीगच्या पॅरिस लेगमध्ये नीरजचा सर्वात मोठा प्रतिस्पर्धी म्हणून ओळखला जाणाऱ्या अँडरसन पीटर्सने सर्वांना निराश केलं. या स्पर्धेत तो त्याच्या नावाला साजेशी कामगिरी करू शकला नाही. त्याने ७७.८९ मीटरच्या थ्रोने सुरुवात केली. तसेच पाच प्रयत्नांमध्ये तो केवळ ८०.२९ मीटर लांब थ्रो करू शकला.

नीरजची पुढची स्पर्धा २४ जून रोजी

नीरज चोप्रा आता २४ जून रोजी ओस्ट्राव्हा गोल्डन स्पाइक २०२५ अ‍ॅथलेटिक्स मीटमध्ये मैदानात उतरेल. चेक प्रजास्ताकमध्ये या स्पर्धेचं आयोजन करण्यात आलं आहे. त्यानंतर ५ जुलै रोजी बंगळुरूत आयोजित एका स्पर्धेत नीरज खेळताना दिसेल.