New Zealand Batter Chad Bowes World Record: न्यूझीलंडचा फलंदाज चॅड बोवेसने लिस्ट ए क्रिकेटमध्ये नवा जागतिक विक्रम घडवला आहे. न्यूझीलंडमधील देशांतर्गत क्रिकेट स्पर्धा फोर्ड कप स्पर्धेत सर्वात जलद द्विशतक झळकावत त्याने दिग्गज क्रिकेटपटूंचा विक्रम मोडत नवा विक्रम घडवला आहे. न्यूझीलंडमधील देशांतर्गत क्रिकेट स्पर्धा फोर्ड कप टूर्नामेंटमध्ये ओटागो व्होल्ट्स संघाच्या गोलंदाजांची धुलाई करत त्याने लिस्ट ए मधील सर्वात जलद द्विशतक झळकावले. कँटरबरी किंग्जचे प्रतिनिधित्व करताना, या फलंदाजाने व्हॉल्टसविरुद्ध फलंदाजी करताना १०३ चेंडूत शानदार द्विशतक झळकावले.
३२ वर्षीय बोवेसने २७ चौकार आणि सात षटकार लगावले आणि किंग्जला ५० षटकांत ९ बाद ३४३ धावांपर्यंत मजल मारता आली. बोवेसने ऑस्ट्रेलियाचा ट्रॅव्हिस हेड आणि भारतीय यष्टीरक्षक फलंदाज एन जगदीसन यांचा लिस्ट ए क्रिकेटमधील सर्वात वेगवान द्विशतकांचा संयुक्त विक्रम मोडला. या दोन्ही खेळाडूंनी ११३ चेंडूत द्विशतक झळकावले होते. तर बोवेसने ही कामगिरी १०३ चेंडूत नवा विक्रम रचला आहे. अखेरीस तो ११० चेंडूत २०५ धावा करून बाद झाला.
फोर्ड कप स्पर्धेत दुसऱ्यांदा द्विशतक झळकावलेले पाहायला मिळाले आहे. यापूर्वी २०१२-१३ मध्ये जेमी हाऊने सेंट्रल स्टॅगसाठी २२२ धावा केल्या होत्या. योगायोगाने, बोवेसची मॅरेथॉन खेळी त्याच्या १०० व्या लिस्ट ए सामन्यात पाहायला मिळाली. उजव्या हाताच्या सलामीच्या फलंदाजाने किवी संघासाठी सहा एकदिवसीय सामने आणि ११ टी-२० सामने खेळले आहेत. हे सामने त्याने २०२३ मध्ये खेळले आहेत.
बोवेसने केवळ ५३ चेंडूंमध्ये आपले शतक झळकावले, ज्यामुळे ते स्पर्धेच्या इतिहासातील चेंडूंच्या दृष्टीने पाच जलद शतकांपैकी एक बनले. सर्वात वेगवान शतकाचा विक्रम न्यूझीलंडचा माजी कर्णधार रॉस टेलरच्या नावावर आहे. त्याने २०२१-२२ मध्ये सेंट्रल स्टॅगसाठी ४९ चेंडूत शतक झळकावले.
दक्षिण आफ्रिकेत जन्मलेल्या बोवेसने २०१५ मध्ये न्यूझीलंडला जाण्यापूर्वी प्रोटीज अंडर-१९ संघात आपल्या क्रिकेट कारकिर्दीची सुरुवात केली. २०१२ च्या अंडर-१९ विश्वचषक स्पर्धेत त्याने दक्षिण आफ्रिकेचे नेतृत्व केले आणि त्या स्पर्धेतील सर्वात जास्त धावा करणाऱ्या खेळाडूंपैकी एक होता.
हेही वाचा – Ayush Badoni : खेळाडू आहे की सुपरमॅन! आयुष बदोनीने घेतलेला चित्तथरारक झेल पाहून सर्वच अवाक्, पाहा VIDEO
पुरुषांच्या लिस्ट ए क्रिकेटमधील सर्वात जलद द्विशतक
१०३ चेंडू – चॅड बोवेस वि ओटागो, २०२४
११४ चेंडू – ट्रॅव्हिस हेड विरुद्ध क्वीन्सलँड, २०२१
११४ चेंडू – नारायण जगदीसन वि अरुणाचल प्रदेश, २०२२
