ब्राझीलमध्ये चाहत्यांच्या संतापाचा पुन्हा उद्रेक

ब्राझीलचे यशापयश चाहत्यांवर अवलंबून
 रिओ डी जानेरो : ब्राझीलवासीयांचे फुटबॉलप्रेम सर्वश्रुत आहे. घरच्या मैदानावर होणाऱ्या फिफा विश्वचषक स्पर्धेत ब्राझीलचे यशापयश हे चाहत्यांवरच अवलंबून असणार आहे. ब्राझील संघ फिफा विश्वचषकासाठी प्रबळ दावेदार असला तरी चाहत्यांचे प्रचंड दडपण ब्राझीलच्या जेतेपदाच्या मार्गात अडथळा ठरू शकते.
सहाव्यांदा विश्वचषक जिंकण्यासाठी सज्ज असलेल्या ब्राझीलचा सलामीचा सामना १२ जूनला क्रोएशियाविरुद्ध होणार आहे. घरच्या मैदानावर फिफा विश्वचषकाचे आयोजन करताना १९५० सालच्या विश्वचषक स्पर्धेच्या आठवणी पुन्हा एकदा ताजा झाल्या आहेत. ब्राझीलमध्ये झालेल्या या स्पर्धेत उरुग्वेने ब्राझील संघावर २-१ अशी मात करत यजमान चाहत्यांचा हिरमोड केला होता. पण या वेळी ब्राझील संघ घरच्या मैदानावर करिश्मा करण्यासाठी सज्ज झाला आहे.
‘‘अन्य संघांपेक्षा आमच्याकडे एक गोष्ट वेगळी आहे ती म्हणजे चाहत्यांची फौज. तब्बल २०० दशलक्ष चाहते ब्राझीलच्या विश्वविजेतेपदासाठी आसुसलेले आहेत. हेच संघासाठी सर्वात मोठे पाठबळ ठरणार आहे,’’ असे ब्राझीलचे प्रशिक्षक लुइझ फेलिपे स्कोलारी म्हटले होते.