Suryakumar Yadav on Champions Trophy India Squad Snub: सूर्यकुमार यादव टी-२० आंतरराष्ट्रीय क्रिकेटमधील एक उत्कृष्ट फलंदाज आहे. टी-२० क्रिकेटमधील सूर्यकुमार यादवचा रेकॉर्डही कमाल आहे. यामुळेच सूर्याला भारतीय टी-२० संघाचे कर्णधारपद देण्यात आले आहे. संघाचं नेतृत्त्व करताना सूर्या आपली योग्य भूमिका बजावत आहे. सूर्या मधल्या फळीतील एक उत्कृष्ट फलंदाज असताना त्याला १९ फेब्रुवारीपासून होणाऱ्या चॅम्पियन्स ट्रॉफीसाठी संघात निवड करण्यात आलेली नाही. याबाबत सूर्यकुमार यादवने इंग्लंडविरूद्धच्या पहिल्या सामन्यापूर्वीच्या पत्रकार परिषदेत बोलताना उत्तर दिलं आहे.
सूर्यकुमार यादवची चॅम्पियन्स ट्रॉफी संघात निवड केली नाही, यावरून अनेक दिग्गजांनी वक्तव्य केले. सूर्यकुमार यादव संघासाठी एक्स फॅक्टर ठरू शकला असता असं सुरेश रैना म्हणाला. पण सूर्यकुमार यादवची वनडे क्रिकेटमधील कामगिरी फारशी चांगली नव्हती. एकदिवसीय क्रिकेटमधील त्याची आकडेवारी निराशाजनक आहे आणि त्यामुळे त्याची चॅम्पियन्स ट्रॉफीसाठी भारतीय संघात निवड झाली नाही.
खुद्द सूर्यकुमार यादवने वनडेमध्ये त्याची कामगिरी चांगली नसल्याचे मान्य केले. त्याने कामगिरी चांगली केली असती तर त्याला चॅम्पियन्स ट्रॉफी संघात स्थान मिळाले असते, असेही तो म्हणाला. चॅम्पियन्स ट्रॉफीसाठी टीम इंडियाचा भाग नसल्याबद्दल सूर्यकुमार दु:खी नाही, पण एका गोष्टीबाबत त्याची मनातील वेदना स्पष्टपणे समोर आली.
इंग्लंडविरूद्ध पहिल्या टी-२० सामन्यापूर्वी पत्रकार परिषदेसाठी उपस्थित होता. यादरम्यान त्याला प्रश्न विचारण्यात आला की, ‘चॅम्पियन्स ट्रॉफी संघात नसल्याबद्दल तू दु:खी आहेस का?’ यावर सूर्या म्हणाला, “मी दु:खी का असेन? जर मी चांगली कामगिरी केली असती तर चॅम्पियन्स ट्रॉफी संघात असतो. जर मी चांगली कामगिरी केली नाही तर ती गोष्ट स्वीकारणं महत्त्वाचं आहे.” तो पुढे म्हणाला, “आपण जर चॅम्पियन्स ट्रॉफीचा संघ पाहिला तर ते सर्वच खेळाडू खूप योग्य दिसत आहे. त्यात असलेले सर्व खेळाडू एकदिवसीय सामन्यात भारतासाठी चांगली कामगिरी करणारे आहेत.”
चॅम्पियन्स ट्रॉफीसाठी भारतीय संघात स्थान न मिळाल्याचे सूर्या दु:खी नसून तो एकदिवसीय फॉरमॅटमध्ये चांगला खेळू शकला नाही याची त्याला खंत आहे. सूर्यकुमार पुढे म्हणाला, “मी चांगली कामगिरी केली नाही, हे विचार करून वाईट वाटतंय आणि जर मी चांगलं प्रदर्शन करत आलो असतो तर मी संघात असतो. पण जर मी चांगली कामगिरी केली नाही, तर खरोखर चांगली कामगिरी करू शकणारा कोणीतरी चॅम्पियन्स ट्रॉफीसाठी संघात निवड होण्यास पात्र आहे.”
सूर्यकुमार हा टी-२० इंटरनॅशनलमधील विस्फोटक फलंदाज आहे. त्याने ४ शतकांच्या मदतीने २५०० हून अधिक धावा केल्या आहेत. पण एकदिवसीय क्रिकेटमध्ये त्याने ३७ सामन्यांमध्ये एकही शतक केलंल नाही. त्याने ३५ डावात ४ अर्धशतकांच्या मदतीने ७३६ धावा केल्या आहेत.
