Drinking Water At Night Benefits : आजकाल दिवसभराच्या धावपळीच्या आणि धकाधकीच्या जीवनात आरोग्याकडे लक्ष देण्यास वेळ मिळत नाही, अशाने झोप नीट पूर्ण होत नाही. अशा परिस्थितीत रात्री एक ग्लास कोमट पाणी पिणे दिवसभराचा थकवा दूर करण्यासाठी फायदेशीर ठरू शकते. यामुळे केवळ शरीराचा थकवाच दूर होत नाही तर याने पचनक्रियेसह झोपेची गुणवत्ता सुधारते. पण, शरीरास आणखी कोणते जबरदस्त फायदे मिळतात जाणून घेऊ…
१) पचनक्रिया सुधारते
कोमट पाणी प्यायल्याने पचनसंस्था चांगली राहते, रात्रीच्या जेवणानंतर कोमट पाणी प्यायल्यास अन्न पचण्यास मदत होते; यामुळे गॅस, अपचन आणि बद्धकोष्ठता यांसारख्या समस्या टाळता येतात. सकाळी पोट नीट साफ होते.
२) विषारी पदार्थ बाहेर काढण्यास मदत
आजकाल बरेच लोक बाहेरील अन्नपदार्थ खाणे पसंत करतात, अशा परिस्थितीत रात्री झोपण्यापूर्वी एक ग्लास कोमट पाणी पिऊन झोपल्यास शरीरातील विषारी पदार्थ बाहेर काढण्यास मदत होते. यामुळे शरीरास एकप्रकारे थंडावा आणि आराम मिळतो.
३) झोपेची गुणवत्ता सुधारते
रात्री कोमट पाणी पिऊन झोपल्यास स्नायूंना आराम मिळतो. मन शांत होते, ज्यामुळे शांत झोप लागण्यास मदत होते. ज्यांना निद्रानाश किंवा झोपेसंबंधित काही समस्या असतील तर त्यांनी झोपण्यापूर्वी कोमट पाणी पिणे फायदेशीर ठरू शकते.
४) वजन नियंत्रणात राहते
वजन नियंत्रणात ठेवण्यासाठी कोमट पाणी पिणे हा एक उत्तम उपाय आहे. यामुळे शरीरातील चयापचय क्रिया जलद गतीने होते, ज्यामुळे शरीरातील अतिरिक्त कॅलरीज बर्न होतात. रात्री कोमट पाणी पिऊन झोपल्यास शरीरातील अतिरिक्त चरबी कमी करण्यास मदत होते.
५) त्वचा निरोगी आणि चमकदार राहते
रात्री कोमट पाणी पिऊन झोपल्यास रक्ताभिसरण सुधारते, ज्यामुळे ऑक्सिजन आणि पोषक तत्वे त्वचेपर्यंत सहज पोहोचतात. यामुळे त्वचा खोलवर स्वच्छ होते. यामुळे त्वचेवरील मुरुमे आणि सुरकुत्या कमी होतात.
