डोळ्यांसाठी कॉन्टॅक्ट लेन्स वापरणाऱ्यांनो सावधान! वाढतोय कॅन्सरचा धोका; संशोधनातून धक्कादायक माहिती उघड

कॉन्टॅक्ट लेन्समुळे होऊ शकतो कॅन्सर?

‘द गार्डियन’मध्ये प्रकाशित झालेल्या अभ्यासानुसार, अमेरिकेतील अनेक सॉफ्ट कॉन्टॅक्ट लेन्स या मोठ्या प्रमाणात विषारी आणि कर्करोगाला कारणीभूत ठरणाऱ्या घटकांपासून बनलेल्या असतात. संशोधकांनी १८ प्रसिद्ध अशा कॉन्टॅक्ट लेन्सची चाचणी केली. या वेळी प्रत्येक कॉन्टॅक्ट लेन्समध्ये पॉलीफ्लोरोआकाइल पदार्थाच्या (पीएफए) एका मार्करमध्ये कार्बनिक फ्लोरीनची उच्च पातळी आढळली आहे. यावरून जर खूप वेळ तुम्ही कॉन्टॅक्ट लेन्सचा वापर केल्यास शरीरातील कॅन्सरच्या पेशी सक्रिय होऊ शकतात आणि त्यामुळे तुम्ही कॅन्सरचे शिकार होऊ शकता असा अंदाज शास्त्रज्ञांनी व्यक्त केला आहे.

यातील पीएफएएस हा १४००० केमिकल्सचा एक ग्रुप आहे जो सामान्यतः विविध गोष्टींमध्ये वॉटर रेजिस्टन्स किंवा हीट रेजिस्टन्स बनवण्यासाठी वापरला जातो. यामुळे उष्णता आणि पाण्याचा त्या गोष्टीवर काहीही फरक पडत नाही. जसे की कपडे, फर्निचर, पॅकेजिंग आणि वायरिंगसह अनेक घरगुती वस्तू चिकटवण्यासाठी वापरला जातो. हे एक मजबूत केमिकल असते जे नैसर्गिकरित्या तुटत नाही.

होऊ शकतात ‘हे’ इतर आजार

पीएफएएस हे मानवनिर्मित केमिकल आहे जे वातावरणात दीर्घकाळ टिकून राहते. हे फ्लोरिन आणि कार्बनचे मिश्रण करून तयार केले जाते. पीएफएएस कॅन्सर, गर्भधारणेतील गुंतागुंत, यकृताचे रोग, मूत्रपिंडाचे रोग आणि ऑटोइम्यून विकार यांसारख्या अनेक समस्यांशी देखील जोडलेले आहे. मात्र कॉन्टॅक्ट लेन्सशी संबंधित या संशोधनात आणखी संशोधन होण्याची गरज आहे, पण तुम्ही वापरताना काळजी घ्या आणि तज्ज्ञ डॉक्टरांच्या सल्ल्यानेच काँटॅक्ट लेन्सची निवड करा.