Which Water Is Best For Bathing: थंड पाण्याने अंघोळ केल्याने अनेकदा विविध आरोग्य फायद्यांचा संबंध येतो, जसे की उर्जेची पातळी वाढवण्यापासून ते रक्ताभिसरण सुधारण्यापर्यंत. मात्र, ही पद्धत काही व्यक्तींसाठी, विशेषतः ज्यांना आरोग्याच्या समस्या आहेत त्यांच्यासाठी काही धोके घेऊन येऊ शकते. थंड पाण्याचे उत्साहवर्धक परिणाम आकर्षक असू शकतात, परंतु तापमानात अचानक होणारा हा बदल शरीरावर कसा परिणाम करतो हे समजून घेणे आवश्यक आहे; विशेषतः हृदय व रक्तवाहिन्यांसंबंधी आजार असलेल्यांसाठी. चला तर मग जाणून घेऊयात, थंड पाण्याने अंघोळ केल्यावर शरीरावर काय परिणाम होतो?
थंड पाण्याचा तुमच्या शरीरावर कसा परिणाम होतो
दिल्लीतील सीके बिर्ला हॉस्पिटलमधील इंटरनल मेडिसिनमधील प्रमुख सल्लागार डॉ. नरेंद्र सिंघला यांनी द इंडियन एक्स्प्रेसशी बोलताना या संदर्भात सविस्तर माहिती दिली आहे. डॉ. नरेंद्र सिंघला स्पष्ट करतात की, थंड पाण्याचा वापर शरीराला अचानक तापमानात बदल घडवून आणतो, यामुळे रक्तवाहिन्या आकुंचन पावतात. यामुळे रक्तदाब वाढतो आणि रक्ताभिसरण चालू ठेवण्यासाठी हृदयाला अधिक काम करावे लागते.
जरी थंड पाण्याने अंघोळ केल्याने निरोगी व्यक्तींमध्ये रक्ताभिसरण सुधारू शकते, परंतु हृदयरोग असलेल्या लोकांसाठी ते हानिकारक असू शकते. डॉ. सिंघला म्हणतात की, अचानक थंडीच्या झटक्याने हृदय गती आणि रक्तदाब वाढतो, जो हृदय व रक्तवाहिन्यांसंबंधी समस्या असलेल्यांसाठी धोकादायक असू शकतो.
डॉ. सिंघला यांच्या मते, हृदयरोग असलेल्या व्यक्तींसाठी थंड पाण्याने अंघोळ केल्याने अनेक कारणांमुळे मोठे धोके निर्माण होऊ शकतात.
हृदय गती आणि रक्तदाब वाढणे : डॉ. सिंघला स्पष्ट करतात की, थंड पाण्याच्या संपर्कामुळे हृदय गती आणि रक्तदाब जलद वाढतो, जो उच्च रक्तदाब किंवा कमकुवत हृदय असलेल्या व्यक्तींसाठी समस्या बनू शकते. हृदय व रक्तवाहिन्यांचा हा वाढलेला ताण हृदयविकाराचा झटक्यास कारणीभूत ठरू शकतो.
रक्तवाहिन्यांचे आकुंचन : डॉ. सिंघला यांनी सांगितल्याप्रमाणे, शरीराची नैसर्गिक प्रतिक्रिया म्हणजे शरीराचे मुख्य तापमान राखण्यासाठी रक्तवाहिन्या आकुंचन पावणे. हृदयरोग असलेल्या लोकांसाठी हे आकुंचन हृदय आणि मेंदूसारख्या गंभीर भागात रक्त प्रवाह मर्यादित करू शकते, ज्यामुळे हृदयविकाराचा झटका किंवा स्ट्रोकचा धोका वाढतो.
हृदय व रक्तवाहिन्यांसंबंधी प्रणालीवर ताण : डॉ. मंजुषा अग्रवाल, वरिष्ठ सल्लागार-अंतर्गत औषध, ग्लेनेगल्स हॉस्पिटल्स, परळ, मुंबई, यावर भर देतात की, थंड पाण्यामुळे होणारा अतिरिक्त हृदयविकाराचा ताण आधीच हृदयरोग असलेल्या व्यक्तींसाठी खूप जास्त असू शकतो. या ताणामुळे दम लागणे, छातीत दुखणे किंवा हृदयविकाराचा झटकादेखील येऊ शकतो.
हृदयरोग्यांसाठी पर्यायी पद्धती काय आहेत?
डॉ. सिंघला हृदयरोग असलेल्यांसाठी थंड पाण्याने अंघोळ करण्याऐवजी सुरक्षित पर्याय सुचवतात:
कोमट पाण्याने अंघोळ : डॉ. सिंघला यांच्या मते, कोमट पाणी हृदयावर जास्त ताण न देता रक्ताभिसरण वाढवू शकते. हा पर्याय स्नायूंना आराम देण्यासाठी आणि थंड पाण्याशी संबंधित जोखीम न घेता मानसिक स्पष्टता सुधारण्यासाठीदेखील प्रभावी आहे.
कोमट आणि थंड पाण्याने अंघोळ : डॉ. सिंघला कोमट आणि थंड पाण्यामध्ये आलटून पालटून अंघोळ करण्याची शिफारस करतात. ही पद्धत रक्ताभिसरण सुधारण्यास मदत करू शकते, परंतु हृदयरोग असलेल्या व्यक्तींनी आधी डॉक्टरांचा सल्ला जरूर घ्यावा.
