नरेंद्र मोदींचा मॅरेथॉन प्रचार

हायटेक माध्यमांतून ४००० वेळा ‘लोकसंवाद’
देशभरातील विविध शहरांमधील जनतेशी ‘व्हिडीओ कॉन्फरन्सिंग’च्या माध्यमातून ‘चाय पे चर्चा’ या अभिनव उपक्रमाचे आयोजन करण्यात आले होते. या माध्यमातून मोदींनी तब्बल ४००० वेळा लोकसंवाद साधला. या कार्यक्रमांत भारतातील नागरिकांसह १५ विविध देशांमधील सुमारे १० लाख लोक सहभागी झाले होते.

 ५ ते १० कोटी लोकांशी संपर्क?
हरयाणातील रेवारी येथे निवृत्त लष्करी अधिकाऱ्यांसाठी आयोजित करण्यात आलेल्या रॅलीपासून मोदींनी निवडणूक प्रचारास प्रारंभ केला आणि १० मे रोजी उत्तर प्रदेशातील बलिया येथे आपली शेवटची प्रचारसभा घेतली.  या कालावधीत मोदींनी देशभरातील किमान ५ ते १० कोटी जनतेशी ‘संपर्क’ साधल्याचा दावा भाजपने केला आहे.

प्रथमच ‘व्यापक संरक्षण व्यवस्था’
देशभरात झंझावाती प्रचारदौरे करणाऱ्या नरेंद्र मोदींच्या संरक्षणाचे आव्हान पेलण्यासाठी या काळात संरक्षण दलांना कसरत करावी लागली. त्यांच्याभोवती सतत ‘विशेष सुरक्षेचे कडे’ तैनात ठेवण्यात आले होते. या दोन महिन्यांच्या निवडणूक प्रचारांदरम्यान, त्यांच्याभोवती नॅशनल सिक्युरिटी ग्रुप (एनएसजी)चे ब्लॅक कॅट कमांडो तसेच ‘प्रगत सुरक्षा संपर्क अधिकारी’ तैनात करण्यात आले होते. हा चमू मोदी यांच्या प्रचारसभेच्या तसेच त्यांच्या संभाव्य भेटींच्या स्थळांविषयी आपला अहवाल देत असे. संरक्षणाच्या ताणाचा परिणाम होऊ नये यासाठी या चमूमध्ये तब्बल १०० ‘कमांडो’ सज्ज ठेवण्यात आले होते. देशात यापेक्षा अधिक संरक्षण केवळ पंतप्रधान व त्यांच्या कुटुंबीयांनाच देण्यात येते.