28 February 2021

News Flash

रावसाहेब दानवेंना जावई हर्षवर्धन जाधवांनी दिला जाहीर इशारा; म्हणाले…

"...तर मी माझ्या बापाची अवलाद नाही",

भाजपा नेते रावसाहेब दानवे आणि त्यांचे जावई हर्षवर्धन जाधव यांच्यातील वाद पुन्हा एकदा चव्हाट्यावर आला आहे. लोकसभा निवडणुकीत पराभव केल्याशिवाय राहणार नाही असे आव्हानच हर्षवर्धन जाधव यांनी सासरे रावसाहेब दानवेंना दिले आहे. यावेळी त्यांनी अनेक गंभीर आरोपदेखील केले आहेत. ते पुण्यात पत्रकारांशी बोलत होते.

“रावसाहेब दानवे यांनी आजवर माझ्यावर केंद्राच्या सत्तेचा वापर करून गुन्हे दाखल केले आहेत हे अनेकदा स्पष्ट झाले आहे. त्याच दरम्यान एकदा रावसाहेब दानवे मला एकदा म्हणाले होते की, तुला नाक घासत आणले नाही, तर रावसाहेब दानवे नाव सांगणार नाही. अशी मस्ती त्यांच्यामध्ये दिसून येते. त्यामुळे त्यांना कटाक्ष भावनेने सांगतो की, पुढील जालना लोकसभा मतदारसंघात पाडून दाखविल्याशिवाय राहणार नाही. नाही तर मी माझ्या बापाची अवलाद नाही,” असे हर्षवर्धन जाधव म्हणाले आहेत.

पुण्यात साधारण दोन महिन्यांपूर्वी ज्येष्ठ नागरिकाला मारहाण केल्याप्रकरणी त्यांची कारागृहात रवानगी करण्यात आली होती. याप्रकरणी जामीन मिळावा अशी मागणी त्यांनी न्यायालयात केली होती. जामीन मिळून बाहेर आल्यानंतर त्यांनी सर्व प्रकरणावर भूमिका मांडली.

यावेळी हर्षवर्धन जाधव म्हणाले की, “माझ्यावर आणि माझी सहकारी ईशा झा यांच्यावर गुन्हा दाखल झाला आहे. त्याबद्दल विनम्रपूर्वक सांगायचे आहे की, आम्हा दोघांवर खोटे गुन्हे दाखल करण्यात आले. सर्व घटनाक्रम पाहिला तर कुठे तरी पाणी मुरल्याचे दिसत आहे. माझ्यातील आणि रावसाहेब दानवे यांच्यातील वाद याला पूर्णपणे कारणीभूत आहे. कारण काही महिन्यांपूर्वी एक व्हिडिओ समोर आणला होता. तेव्हा त्यात मी म्हटले होते की, रावसाहेब दानवे हे माझ्या जिवावर उठले आहेत. माझ्यावर वेगवेगळया पद्धतीच्या केसेस दाखल करणार अशी त्यांनी धमकी दिल्याचेही मी बोललो होतो. जेव्हा अशा गोष्टी होतील त्यावेळी रावसाहेब दानवे यांना जबाबदार धरण्यात यावे अशी भूमिका मी मांडली होती. तशीच परिस्थिती आजच आहे”.

“आजवर अनेक घटनांमधून रावसाहेब दानवे यांचे नाव पुढे येत असून केंद्राच्या सत्तेचा पुरेपूर वापर करून गुन्हे दाखल केले गेले आहेत. या सर्व घटना लक्षात घेता. मला आणि माझी सहकारी दोघांना बाहेर पडताना एक भीती वाटते. त्यामुळे राज्याचे मुख्यमंत्री उद्धव ठाकरे, राष्ट्रवादी काँग्रेस पक्षाचे सर्वेसर्वा शरद पवार आणि गृहमंत्री अनिल देशमुख यांनी आमच्या सारख्यांना संरक्षण द्यावे,” अशी मागणी त्यांनी यावेळी केली.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on February 8, 2021 4:52 pm

Web Title: harshwardhan jadhav challenge to father in law bjp raosaheb danve svk 88 sgy 87
Next Stories
1 “महाराष्ट्र सरकार या सेलिब्रिटींचीही चौकशी करणार का?”; भाजपा नेत्याने शेअर केले स्क्रीनशॉर्ट्स
2 “भारतरत्नांची चौकशी करणारे असे ‘रत्न’ देशात कुठेही सापडणार नाहीत”
3 “काय मोगलाई लागली का?,” अजित पवार मोदी सरकारवर संतापले
Just Now!
X