सज्जनगडहून दुचाकीवरून परतताना अनिकेत संजय मोरे (वय २०, रा. जकातवाडी), अक्षय रमेश माने (वय १८, रा. डबेवाडी) यांचा अपघाती मृत्यू झाला. पोलीस सूत्रानुसार कॉलेजला सुटी असल्याने अनिकेत व अक्षय हे मित्र दुचाकीवरून सज्जनगडला गेले होते. बारावीची परीक्षा संपल्यामुळे मित्रपरिवारासमवेत सज्जनगडावरील मठामध्ये प्रसाद घेऊन ते साता-याकडे येत होते. अनिकेत दुचाकी चालवत होता तर अक्षय मागे बसला होता. त्याच वेळी परळीकडून निघालेल्या मोटारची भोंदवडे फाटा येथे दुपारी दोनच्या सुमारास धडक झाली. यामध्ये दोघा मित्रांचा जागीच मृत्यू झाला. जकातवाडी व डबेवाडी येथे त्यांच्यावर अंत्यसंस्कार करण्यात आले. अनिकेत व अक्षय हे दोघे शिक्षण घेत असल्यापासूनचे मित्र होते. अनिकेत येथील कला व वाणिज्य महाविद्यालयात अकरावीचे शिक्षण घेत होता. काही वर्षांपूर्वीच अनिकेतच्या वडिलांचा मृत्यू झाला होता व तो आईसमवेत आपल्या मामाकडे जकातवाडीस राहात होता.