अकोले: अकोले शहर व परिसरास पावसाने आज, सोमवारी पहाटे पुन्हा एकदा झोडपून काढले. तासाभरातच ३.५ इंचापेक्षा जास्त पाऊस पडला. गत आठ-दहा दिवसांपासून तालुक्यात रोज पाऊस होत आहे. अनेक ठिकाणी तर ढगफुटीसदृश पाऊस झाला. सततच्या पावसामुळे पिकांचे मोठे नुकसान झाले. मे महिन्यात प्रथमच एवढा पाऊस पडल्याचे जुनी माणसे सांगतात.
मागील दहा दिवसांत अकोल्यात २३६ मिमी. पावसाची नोंद झाली. जो सरासरीच्या २५ टक्क्यांपेक्षा जास्त आहे. गेल्या दहा दिवसांत झालेला एकूण पाऊस मिमी.मध्ये पुढील प्रमाणे- भंडारदरा १२८, घाटघर १७७, पांजरे ९३, रतनवाडी १६४, वाकी १०१, निळवंडे २०८, आढळा धरण १०४.
तालुक्यात पर्जन्यमापकांची संख्या पुरेशी नाही. त्यामुळे झालेल्या नुकसानीची तीव्रता या आकडेवारीवरून लक्षात येत नाही. प्रवरा, आढळा खोऱ्यात अनेक ठिकाणी वादळी वाऱ्याच्या साथीने मर्यादित भागात तीव्रतेने अवघ्या तास-दीड तासात कोसळत असलेल्या पावसाने शेतीपिकांचे मोठे नुकसान झाले. निळवंडे, भंडारदरा, आढळा धरणांच्या पाणलोटातही मुसळधार पावसाने हजेरी लावली. त्यामुळे मे महिन्यातच ओढे वाहिले. धरणांमध्ये नवीन पाणी येऊ लागले आहे.
भंडारदरा धरणात सध्या ३ हजार ६६ दलघफूट (२७.७७ टक्के) पाणी शिल्लक आहे. आज धरणात ५९ दलघफूट पाण्याची भर पडली. निळवंडे धरणाचा आजचा पाणीसाठा २ हजार १५८ दलघफूट(२५.९१ टक्के) होता. धरणात आज ७९ दलघफूट नवीन पाणी आले. धरणाच्या डाव्या कालव्यातून ३०० क्युसेक तर उजव्या कालव्यातून २०० क्युसेक असा ५०० क्युसेक विसर्ग सुरू आहे. भंडारदऱ्यातून ७८० क्युसेक विसर्ग वीजनिर्मितीसाठी सुरू आहे तर कोदनी जलविद्युत प्रकल्पासाठी प्रवरा नदीपात्रातून २ हजार ६२१ क्युसेक पाणी वापरले जाते. वीजनिर्मितीनंतर हे पाणी निळवंडे धरणात जमा होते. आढळा धरणातही १० दलघफूट नवीन पाणी आले. धरणात सध्या ५०४ दलघफूट (४६.६० टक्के) पाणी शिल्लक आहे.
पावसाने हवेत चांगलाच गारठा निर्माण झाला. वातावरणातील बदल लक्षात घेता या वर्षी तालुक्यात मोसमी पावसाचे आगमन नेहमीपेक्षा खूपच लवकर होण्याची चिन्हे दिसत आहेत. आज सकाळपर्यंतच्या चोवीस तासात पडलेला पाऊस मिमीमध्ये पुढीलप्रमाणे- भंडारदरा ५५, घाटघर ३६, पांजरे ३०, रतनवाडी ४९, वाकी २८, निळवंडे ४६, आढळा ४२ व अकोले ८४.
पावसाने काजवे नाहीत
मे महिन्याच्या शेवटच्या आठवड्यापासून भंडारदरा परिसरात काजवे दिसायला लागतात. ते पाहायला पर्यटक मोठ्या संख्येने येत असतात. काल, रविवार असल्यामुळे भंडारदरा येथे गर्दी केलेल्या पर्यटकांना मुसळधार पावसामुळे काजवे न पाहताच परतावे लागले.
