बाबा सिद्दीकींचा अजित पवार गटात जाहीर प्रवेश; म्हणाले, “४८ वर्षांनी…”

गेल्या ४८ वर्षांनंतर मी आज पहिल्यांदा काँग्रेससाठी भाषण करत नाहीय, असं बाबा सिद्दीकी आपल्या भाषणात सुरुवातीलाच म्हणाले. राष्ट्रवादी काँग्रेसमध्ये येण्याच्या निर्णयाबाबत बाबा सिद्दीकी म्हणाले, प्रफुल्ल पटेल यांच्या घरी न्याहारी करताना ही चर्चा झाली, त्याच दिवशी १० तारखेला मी राष्ट्रवादीत प्रवेश करणार असे ठरले. मी त्याच दिवशी काँग्रेसच्या वरिष्ठ अधिकाऱ्यांना याची माहिती दिली आणि ४८ वर्षांनी काँग्रेस सोडण्याचा निर्णय घेतला. मी एक खुले पुस्तक आहे. मी कुटुंबाचा माणूस आहे. मला कोणाचेही नुकसान करायचे नाही. येथे समजाचे राजकारण सुरू आहे, त्यामुळे निर्णय घ्यावा लागला. मी सांगितले की मला डिवचू नका, अन्यथा मी सोडणार नाही. मी विश्वासघात करणार नाही. मला प्रत्येक हातात अजित पवारांचे घड्याळ हवे आहे. तसंच, सर्वांना सोबत घेऊन चालायचं आहे. आपल्या पूर्वजांनी जे स्वप्न पाहिलं होतं तसा भारत निर्माण करू.

माजी केंद्रीय मंत्री मिलिंद देवरा यांनी जानेवारीत मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केल्यानंतर गेल्या एका महिन्यात पक्ष सोडणारे बाबा सिद्दीकी हे मुंबई काँग्रेसचे दुसरे ज्येष्ठ नेते आहेत. सिद्दीकी यांचा मुलगा झीशान हेसुद्धा आमदार आहेत, पण त्यांनी अद्याप पक्ष सोडलेला नाही. परंतु, तेही अजित पवार गटात जाण्याची शक्यता वर्तवण्यात येतेय.