नांदेड: भोसीकरांचे दुसरे चिरंजीव ‘गृहवित्त’ महामंडळावर ! ‘सहकारा’च्या माध्यमातून पुनर्वसन

हरिहरराव यांचे निधन झाले तेव्हा ते उपर्युक्त दोन्ही संस्थांच्या संचालक मंडळामध्ये कार्यरत होते, तसेच ते बँकेचे उपाध्यक्षही होते. संचालकपदाची त्यांची जागा रिक्त झाल्यामुळे राज्य सहकारी निवडणूक प्राधिकरणाने विहित प्रक्रिया राबविली. त्यात शिवकुमार भोसीकर यांची उर्वरित कालावधीसाठी संचालकपदी बिनविरोध निवड झाली. दरम्यान, गृहवित्त महामंडळातील भोसीकर यांचे संचालकपद रिक्त झाल्यामुळे येत्या २० ऑगस्ट रोजी हे पद भरण्यासाठी संचालक मंडळाची विशेष सभा मुंबईमध्ये होणार असून तेथे भोसीकरांचे दुसरे चिरंजीव बाळासाहेब यांची निवड करण्याचे जवळपास नक्की झाले असल्याचे सांगण्यात आले.

हरिहररावांनी दीर्घकाळ वरील महामंडळावर नांदेड जिल्ह्याचे प्रतिनिधित्व केले. त्यांना एकदा अध्यक्षपदाची संधी मिळाली होती. विद्यमान संचालक मंडळात त्यांचा चांगला प्रभाव होता. या पार्श्वभूमीवर तेथील प्रमुख कारभार्‍यांनी हरिहररावांच्या पुत्रास संधी देण्याचे ठरवले असून २० तारखेच्या बैठकीत औपचारिकता पूर्ण केली जाईल, असे येथे सांगण्यात आले.