“उद्धवजी ठाकरे, आपण आमच्या कमळाला…”, आशिष शेलारांचं शिवसेना पक्षप्रमुखांना खुलं पत्र!

“तुम्हाला पेंग्विन सेना म्हणायचं का?”

आशिष शेलार यांनी त्यांच्या ट्विटर अकाउंटवरून यासंदर्भात ट्वीट केलं आहे. या ट्वीटमध्ये त्यांनी उद्धव ठाकरेंना लिहिलेलं एक खुलं पत्र शेअर केलं आहे. या पत्रामध्ये त्यांनी भाजपाचा शिवसेनेकडून कमळाबाई अशा शब्दांत उल्लेख करण्याचा समाचार घेतला आहे.

“प्रति, श्री उद्धवजी ठाकरे, संपादक, सामना… महोदय,. आपण आमच्या कमळाला हिणवायला ‘बाई’ म्हणताय? हरकत नाही. बाईमध्ये आई, ताई आणि कडक लक्ष्मीपण आहे. त्यामुळे तुमच्या उरल्यासुरल्या पक्षाला आम्ही आता ‘पेंग्विन सेना’ म्हणायचं का?” असा खोचक सवाल आशिष शेलार यांनी केला आहे. शिवाय पुढे “असे कडक अस्सल मुंबईकर शब्द आमच्याकडेपण आहेत!” असा टोलाही लगावला आहे.

उद्धव ठाकरेंचा ‘शिवसेना पक्षप्रमुख’ म्हणून उल्लेख नाही!

दरम्यान, उद्धव ठाकरेंना लिहिलेल्या या पत्रामध्ये त्यांचा शिवसेना पक्षप्रमुख असा उल्लेख न करता फक्त “संपादक, सामना” असाच उल्लेख आशिष शेलार यांनी केल्यामुळे त्यावरून अनेकांनी भुवया उंचावल्या आहेत. एकीकडे ‘शिवसेना आमचीच’, असा दावा शिंदे गटाकडून केला जात असताना दुसरीकडे भाजपाकडून पाठवण्यात आलेल्या या पत्रात उद्धव ठाकरेंचा उल्लेख ‘शिवसेना पक्षप्रमुख’ असा न केल्यामुळे त्यावरून राजकीय वर्तुळात चर्चा सुरू झाली आहे.