मुख्यमंत्र्यांच्या पदाला धोका नाही, चंद्रकांत पाटील यांचे स्पष्टीकरण

राज्यातील मराठा समाजाच्या आंदोलनामुळे मुख्यमंत्री पदामध्ये बदल करण्याची आमची संस्कृती नाही, असे राज्याचे महसुल मंत्री चंद्रकात पाटील यांनी मुख्यमंत्री यांच्या पदाला कोणताही धोका नसल्याचे स्पष्ट केले. मराठा समाजाच्या मागण्यांसदर्भात मुख्यमंत्र्यांची भूमिका स्पष्ट असल्याचेही ते यावेळी म्हणाले. मराठा समाजाच्या मूक मोर्चाच्या सुरुवातीला फडणवीस यांनी माझ्या विरोधात कारस्थान रचले जात असल्याचे म्हटले होते. तसेच रविवारी मुंबईतील एका कार्यक्रमात फडणवीस यांनी ‘कीती दिवस मुख्यमंत्री पदावर असेल माहित नाही, पण जोपर्यंत असेल तोपर्यंत परिवर्तनाचे काम करेल.’ असे वक्तव्य केले होते. त्यांच्या या दोन वक्तव्यामुळे देवेंद्र फडणवीसांनाही गुजरातमधील माजी मुख्यमंत्री आनंदी बेन पटेल यांच्या प्रमाणे पायउतार व्हावे लागणार का? अशा उलट सुलट चर्चां राजकीय वर्तुळात रंगत होत्या.