Operation Sindoor : “हा नवीन भारत, हे पुन्हा एकदा दाखवून दिलं”, मुख्यमंत्री फडणवीसांची ‘ऑपरेशन सिंदूर’वर प्रतिक्रिया; म्हणाले, “संपूर्ण जग…”

देवेंद्र फडणवीस काय म्हणाले?

“पहलगामच्या हल्ल्यानंतर भारतीय हवाई दलाने ‘एअर स्ट्राईक’ करत पाकिस्तान आणि पाकव्याप्त जम्मू-काश्मीरच्या हद्दीतील ९ दहशतवादी तळ उद्ध्वस्त केले. ज्या प्रकारे जम्मू काश्मीरमध्ये दहशतवाद पसरवण्याचा प्रयत्न पाकिस्तानच्या माध्यमातून होत होता. तसेच पहलगामध्ये ज्या प्रकारे आमच्या बांधवांना मारण्यात आलं. त्यामधून संपूर्ण भारताच्या मनात संताप निर्माण झाला होता. मात्र, आज संपूर्ण भारतीयांना समाधान वाटलं. देशाचे पंतप्रधान नरेंद्र मोदी यांचे मी आभार मानतो”, असं देवेंद्र फडणवीस यांनी म्हटलं आहे.

“पंतप्रधान नरेंद्र मोदी यांनी आधीच सांगितलं होतं की पहलगामच्या घटनेचं प्रत्युत्तर दिलं जाईल. आम्ही अशा प्रकारची घटना सहन करणार नाही, असं मोदींनी स्पष्ट सांगितलं होतं. त्यानंतर अतिशय सबळ अशा प्रकारचं उत्तर भारतीय लष्कराने दिलं आहे. दहशतवाद्यांचे अड्डे नष्ट करण्यात आले आहे. दहशतवादाच्या विरोधातील लढाई भारताने केली आहे. हा नवीन भारत आहे. हा नवा भारत अशा प्रकारचे हल्ले सहन करणार नाही. हे भारताने दाखवून दिलं”, असं देवेंद्र फडणवीस यांनी म्हटलं आहे.

“गेल्या १३ ते १४ दिवसांत जगातील अनेक देशांबरोबर संपर्क करून पहलगामच्या घटनेत पाकिस्तान कसा दोषी आहे? याचे पुरावे भारताने दिले आहेत. पंतप्रधान नरेंद्र मोदी, अमित शाह, राजनाथ सिंह यांनी विविध देशांबरोबर चर्चा करून पाकिस्तानने कशा प्रकारे हल्ला केला हे जगाला देखील सांगितलं आहे. त्यामुळेच आज संपूर्ण जग भारताबरोबर आहे. आपण जर पाहिलं तर पाकिस्तानच्या उत्तरेपासून ते दक्षिणेपर्यंत सगळीकडील दहशतवाद्यांचे अड्डे नष्ट करण्याचं काम भारतीय लष्कराने केलं आहे”, असं देवेंद्र फडणवीस यांनी म्हटलं आहे.