सागर नरेकर करोनाच्या संकटात एकीकडे मोठ-मोठ्या उद्योगांनाही घरघर लागली असताना सर्वसामान्य नागरिकही त्यातून वाचलेला नाही. कनिष्ठ वर्गीयांसाठीही गेली दोन वर्षे आर्थिक संकटाची होती. याच आर्थिक संकटात हातावर पोट असलेल्याचे हाल झाले. अंबरनाथ शहरातील अशाच एका रिक्षाचालकाने बेताच्या आर्थिक परिस्थितीतून आपल्या दोन महिन्यांच्या मुलीचा सौदा केल्याचा धक्कादायक प्रकार समोर आला आहे. अंबरनाथ शहरात शिवनगर परिसरात राहणाऱ्या या दांपत्याला दोन महिन्यांपूर्वी तिसरी मुलगी झाली. याआधी असणाऱ्या दोन मुलींच्या शिक्षणाचा खर्च परवडत नसल्याने दोघेही काम करत होते. वडील रिक्षा चालक असून आई घर काम करत असते. दोन महिन्यांपूर्वी मुलगी झाल्याने या मुलीचा शिक्षणाचा आणि लग्नापर्यंतचा खर्च कसा करायचा या विवंचनेत असलेल्या पित्याचा संपर्क नालासोपारा येथील एका दाम्पत्याशी झाला. त्यांनी एका शंभर रुपयांच्या मुद्रांक शुल्क कागदावर दत्तक विधान करून दोन महिन्यांची मुलगी त्यांच्याकडे सोपवली. जिल्हा महिला व बालविकास अधिकारी कार्यालयाला अंबरनाथ येथील शहरी बाल संरक्षण समितीच्या सदस्यांकडून अशा प्रकारे बाळाचा सौदा झाल्याचे कळाले. जिल्हा महिला व बालविकास अधिकारी महेंद्र गायकवाड यांच्या आदेशानंतर 21 फेब्रुवारी रोजी जिल्हा बाल संरक्षण कक्षाच्या पल्लवी जाधव आणि वन स्टॉप सेंटरच्या सिद्धी तेलंगे यांनी त्वरित अंबरनाथ पोलिस ठाण्यात धाव घेऊन सर्व प्रकार विशद केला. पोलिसांच्या मदतीने दाम्पत्याच्या राहत्या घरावर जाऊन त्यांना पोलीस ठाण्यात आणण्यात आले. त्यांच्याकडे चौकशी केली असता आपली दोन महिन्यांची मुलगी नालासोपारा येथील दांपत्याला दिल्याचे त्यांनी कबूल केले. करोनाच्या काळात लॉकडाउनमुळे आर्थिक बेताची स्थिती निर्माण झाली आहे. मुलीचा सांभाळ, तिचे शिक्षण आणि लग्न करू शकणार नाही म्हणून ही मुलगी दत्तक देण्याचे ठरवल्याचे या दोघांनी सांगितले. या प्रकारानंतर अंबरनाथ पोलीस ठाण्यात पाच जणांविरुद्ध गुन्हा दाखल करण्यात आला आहे. तर बाळाला बालकल्याण समितीच्या आदेशानंतर जननी आशिष या विशेष दत्तक संस्थेत दाखल करण्यात आले आहे. बाळाचे पालक आणि दत्तक पालक या दोघांवर बाल अधिनियम 2015 नुसार गुन्हा दाखल करण्यात आला आहे. पोलीस याप्रकरणी तपास करत आहेत. आपल्या पोटच्या बाळाचा सौदा केल्याच्या धक्कादायक प्रकारानंतर अंबरनाथ शहरात एकच खळबळ उडाली आहे.
