Ajit Pawar On Ladki Bahin Yojana E-KYC : मुख्यमंत्री माझी लाडकी बहीण ही योजना महायुती सरकारने महिलांसाठी सुरू केलेली आहे. या योजनेच्या माध्यमातून लाखो पात्र महिलांना दर महिन्याला १,५०० रुपये दिले जातात. आतापर्यंत मागील काही महिन्यांचे पैसे लाभार्थी महिलांना मिळालेही आहेत. मात्र, आता लाडकी बहीण योजनेसाठी राज्य सरकारने एक महत्वाचा निर्णय घेतला आहे. लाडकी बहीण योजनेचा लाभ घेण्यासाठी आता लाभार्थी महिलांना ई-केवायसी अनिवार्य करण्यात आली आहे.
ई-केवायसी न केल्यास लाडक्या बहिणींना पैसे मिळण्यास अडचण येऊ शकते. दरम्यान, यावर आता राज्याचे उपमुख्यमंत्री अजित पवार यांनी प्रतिक्रिया देत लाडकी बहीण योजनेसाठी ई-केवायसी अनिवार्य का केली आहे? याबाबतचे कारणे अजित पवार यांनी सांगितली आहेत.
अजित पवार काय म्हणाले?
“मी आता चार-पाच जिल्ह्याचा दौरा केला, तेव्हा मी तेथील लाडक्या बहिणींना विचारलं असता मला समजलं की बुहतेक लाडक्या बहिणींनी ई-केवायसी केलेली आहे. कुठेतरी हा पैसा सरकारचा, जनतेचा पैसा आहे. त्यामुळे हा पैसा चुकीच्या पद्धतीने जाऊ नये. जो लाभ लाभार्थ्यांना द्यायचा तो लाभ त्याच्याच खात्यात जावा म्हणून या सर्व गोष्टींचा वापर करण्यात येत आहे. आता मागे देखील आपण योजनेचे पैसे देत होतो, आता काही जण मयत असतात, पण त्यांची नावं कमी केलेली नसतात. असे अनेक कारणे आहेत. त्यासाठी ई-केवायसी सुरू केलेली आहे. आपणच नाही तर देशात सगळीकडेच ई-केवायसी सुरू आहे. याबाबत नागरिकांमध्येही जागृती झालेली आहे”, असं अजित पवारांनी सांगितलं आहे.
ई-केवायसी किती दिवसांत पूर्ण करावी?
मंत्री आदिती तटकरे यांनी काही दिवसांपूर्वी एक्स प्लॅटफॉर्मवर पोस्ट करत मुख्यमंत्री माझी लाडकी बहीण योजनेत पारदर्शकतेला सर्वोच्च प्राधान्य शासन देत असल्याचं म्हणत सर्व लाभार्थी महिलांनी ई-केवायसी प्रक्रिया पूर्ण करावी, असं आवाहन केलं होतं. येत्या दोन महिन्याच्या कालावधीमध्ये सर्व लाडक्या बहिणींना ईकेवायसी प्रक्रिया पूर्ण करावी लागणार असल्याची माहिती त्यांनी दिली होती. या योजनेतील १५०० रुपये यापुढेही मिळत राहावे, असं वाटत असल्यास ही प्रक्रिया करणे अनिवार्य असल्याचंही त्यांनी सांहितलं होतं.
ई-केवायसी प्रक्रिया कशी करायची?
१. लाभार्थी महिलांना https://ladakibahin.maharashtra.gov.in या अधिकृत वेब पोर्टलवर जाऊन ई-केवायसी करायची आहे.
२. या प्रक्रियेमध्ये तुम्हाला तुमची काही महत्त्वाची कागदपत्रे आणि माहिती पुन्हा अपलोड करावी लागेल.
३. यात तुमचे नाव, पत्ता, शिधापत्रिका (रेशन कार्ड) क्रमांक, उत्पन्नाची माहिती आणि आधार कार्डची माहिती यांचा समावेश असेल.
४. मुख्यमंत्री माझी लाडकी बहीण योजना या पेजवर लाभार्थी आधार क्रमांक नोंदवावा लागेल. यानंतर कॅप्चा कोड नोंदवा, तो नोंदवताना चूक होणार नाही याची दक्षता घ्या. कॅप्चा कोड नोंदवल्यानंतर आधार प्रमाणीकरणासाठी संमती द्या.
५. आधार प्रमाणीकरण संमती मधील मजकूर वाचून मी सहमत आहे, या पर्यायावर क्लिक करा. यानंतर ओटीपी पाठवा हा पर्याय निवडा, यानंतर आधार लिंक असलेल्या मोबाईल क्रमांकावर ओटीपी मिळेल.
