समाजमाध्यमाद्वारे बदनामी केल्याचा चौघांविरूद्ध गुन्हा 

फेसबुकवर आक्षेपार्ह मजकूर टाकून रेडकर हॉस्पिटल अ‍ॅण्ड रिसर्च सेंटरची बदनामी करण्याबरोबरच चिथावणीखोर वक्तव्यामुळे आपल्या व रूग्णालयाच्या कर्मचाऱ्यांच्या  जीवितास धोका निर्माण झाल्याची तक्रार डॉ. विवेक रेडकर यांनी मालवण पोलिस ठाण्यात दिली आहे. त्यानुसार इपिडेमिक डिसिजेस (अमेंडमेंट) २०२० चे कलम ३ (२), आयटी कायदा तसेच अन्य कलमान्वये हा गुन्हा दाखल केला आहे.

डॉ. रेडकर यांनी फिर्यादीत म्हटले आहे की, १६ एप्रिलला मनोज खोबरेकर हे आई कै. आशालता (वय ७५ वर्षे) यांना चार ते पाच दिवस छातीत दुखत असल्याने रात्री दोन वाजता हॉस्पीटलमध्ये तपासणीसाठी घेऊन आले. त्यांना दम्याचा त्रास होता. प्राथमिक तपासणी करून ई. सी. जी काढल्यावर त्यांना तीव्र स्वरूपाचा हृदयविकाराचा झटका आल्याचे निदान झाले. त्यावेळी त्यांच्या हृदयाचे ठोके अनियमित व रक्तदाब कमी झाला होता. आम्ही खोबरेकर यांना आईस हृदयविकाराचा तीव्र झटका आल्याने त्यांना अतिदक्षता विभागात  ठेवावे लागेल याची, तसेच  हृदयविकाराचा झटका आल्यानंतर सहा तासात रक्तातील गुठळी विरघळण्यासाठी दिले जाणारे इंजेक्शन मुळातच रुग्ण उशिरा आल्याने  देऊन उपयोग होणार नाही याची कल्पना देण्यात आली. उपचारादरम्यान त्यांच्या आईला म्हातारपणीचा जुना दमा असल्याने व हृदय फुफ्फुसांना रक्तपुरवठा करत नसल्याने ‘कंजेस्टीव्ह हार्ट फेल्युअर’ म्हणजेच फुफ्फुसात पाणी साठून प्रचंड धाप लागण्यास सुरू झाल्याने कृत्रिम श्वसन यंत्रणेवर ठेवावे लागेल, याचीही खोबरेकर व त्यांच्या कुटुंबीयांना कल्पना दिली. यावर, खोबरेकर यांनी आम्हाला तुमच्याच हॉस्पीटलमध्ये उपचार करायचे असल्याचे सांगितल्यानेच आईवर उपचार सुरू ठेवले. असे असताना २२ एप्रिलला खोबरेकर यांनी, आईला अतिदक्षता विभागात ठेवल्याने कफ होत असल्याचे न पटणारे कारण सांगत घरी घेऊन जात असल्याचे सांगितले. त्यावर डॉ. खानोलकर यांनी, कृत्रिम श्वसन यंत्राशिवाय आईला आवश्यक प्राणवायूच्या पुरवठय़ाअभावी जिवंत राहणे अशक्य असल्याचे समजावून सांगितले. मात्र त्यानंतरही खोबरेकर यांनी स्वत:च्या मर्जीने व हट्टाने आईला घरी नेण्याचे ठरवले. त्यामुळे  मानवतेच्या दृष्टिकोनातून आम्ही आवश्यक ती कार्यवाही करून रुग्णाला घरी पाठवले.

डॉक्टरांच्या सल्लय़ाविरुद्ध स्वत:च्या जबाबदारीवर आईला घरी घेऊन जात असल्याचे खोबरेकर यांच्याकडून डॉ. खानोलकर यांच्या समक्ष लेखी लिहून घेण्यात आले आहे. असे असताना, तसेच मी व माझ्या रूग्णालयाच्या  कर्मचाऱ्यांनी  खोबरेकर यांच्या आईच्या वैद्यकीय उपचारामध्ये कोणताही दुर्लक्ष किंवा निष्काळजीपणा केलेला नसतानाही खोबरेकर यांनी फेसबुकवर आक्षेपार्ह पोस्ट केली आहे. ती हटवण्याची विनंती केल्यानंतरही त्यांनी उद्धट उत्तरे दिली, असेही डॉ. रेडकर यांनी तक्रारीत म्हटले आहे.

डॉ. रेडकर यांच्या तक्रारीच्या आधारे पोलिसांनी मनोज खोबरेकर, दिलीप घारे, रवींद्र खानविलकर आणि प्रदीप गावकर या चौघांविरोधात गुन्हा दाखल केला आहे.