Devendra Fadnavis : “उमेदवारी दिलेली नसताना ज्यांनी अर्ज भरलाय…”, बंडखोरांसाठी देवेंद्र फडणवीसांचं मोठं विधान!

बोरीवलीतून गोपाळ शेट्टींसह मुंबई आणि ठाण्यातील अनेक जुने कार्यकर्ते नाराज झाले आहेत. या नाराजीतून त्यांनी अपक्ष अर्ज भरले आहेत. याबाबत आज देवेंद्र फडणवीस म्हणाले, “काही ठिकाणी बंडखोरी झाली आहे. एकमेकांच्या उमेदावारांविरोधात अर्ज भरण्यात आले आहेत. यासाठी आता नीती तयार केली आहे. ज्यांनी तिकिट नसताना उमेदवारी भरलीय त्यांना पक्षात परत घेण्याचा प्रयत्न तिन्ही पक्ष मिळून करणार आहेत. पक्षांतर्गतही काही उमेदवार उभे राहिले आहेत. त्यांनाही विश्वासात घेऊन त्यांच्याशी चर्चा करून त्यांना परत घेण्याचा प्रयत्न असेल.”

हेही वाचा >> Maharashtra Vidhan Sabha Election 2024 Live : ऐन निवडणुकीत काँग्रेसला मोठा धक्का; मोठा नेता भाजपात दाखल

“उमेदवारी अर्ज प्रक्रिया पूर्ण झाली आहे. छाननीही झाली असून अपेक्षित सर्व अर्ज वैध ठरले आहेत. दिवाळी दोन दिवस आहे. त्यानंतर ४-५ तारखेनंतर जोराने प्रचार सुरू होईल. त्याच्या पूर्ण तयारीत आम्ही आहोत”, असं नियोजनही देवेंद्र फडणवीस यांनी सांगितलं.

गोपाळ शेट्टींचं काय करणार?

गोपाळ शेट्टी हे भाजपाचे अतिशय प्रामाणिक सैनिक राहिले आहेत. ते अनेक वेळा आग्रही असतात. शेवटी ते पक्षशिस्त मान्य करतात. त्यांना परिस्थिती समजावून सांगण्याचा प्रयत्न करू. भाजपाच्या पाठी उभं राहण्याची भूमिका ते कायम घेतात, तशीच भूमिका ते आताही घेतील”, असंही देवेंद्र फडणवीस म्हणाले.

महायुतीचं सरकार येणार आहे

भाजपात येत्या काही दिवसात मोठे पक्षप्रवेश होतील. काँग्रेसचे ते नेते कोण हे मला विचारु नका. महायुतीचं सरकार हे सत्तेत येणार आहे. महायुती संदर्भात सकारात्मकता पाहण्यास मिळते आहे. नामांकन पूर्ण झालं आहे. त्यानंतर काही ठिकाणी क्रॉस फॉर्म आले होते. त्यासंदर्भात मुख्यमंत्री एकनाथ शिंदे, उपमुख्यमंत्री अजित पवार यांच्यासह मी आणि महायुतीचे प्रमुख नेते होते. आमच्यातले सगळे इश्यू आम्ही संपवले आहेत. तुम्हाला त्याचं प्रत्यंतर आज आणि उद्या दिसेल.