पुणे जिल्ह्यातील इंदापूर येथे शनिवारी (९ डिसेंबर) ओबीसी एल्गार मेळाव्याचं आयोजन करण्यात आलं होतं. या मेळाव्याला भाजपा आमदार गोपीचंद पडळकर, अजित पवार गटाचे आमदार आणि अन्न तथा नागरी पुरवठा मंत्री छगन भुजबळ उपस्थित होते. या मेळाव्यातून पडळकर आणि भुजबळांनी रोखठोक भाषणं केली. दोघानींही मनोज जरांगे पाटलांना घेरलं.
दरम्यान, गोपीचंद पडळकर शेजारी सुरू असलेल्या आंदोलन स्थळाला भेट देण्याकरता गेले होते. तिथं शेजारीच मराठा समाजाकडून आरक्षण मागणीसाठीचे साखळी उपोषण सुरू होते. यावेळी मराठा समाजाच्या काही कार्यकर्त्यांकडून पडळकरांवर चप्पलफेक करण्यात आली. या प्रकरणानंतर पोलिसांनी तातडीने पडळकरांना सुरक्षित स्थानी हलवलं. या संपूर्ण प्रकारावर भाजपा नेते सुधीर मुनगंटीवार यांनी प्रतिक्रिया दिली आहे.
गोपींचद पडळकरांवर झालेली चप्पलफेक दुर्दैवी बाब आहे, अशी प्रतिक्रिया मुनगंटीवार यांनी दिली. ते प्रसारमाध्यमांशी बोलत होते. पडळकरांवरील चप्पलफेकीबाबत विचारलं असता मुनगंटीवार म्हणाले, “ही एक दुर्दैवी बाब आहे. येत्या २६ जानेवारी २०२४ ला आपण संविधानाच्या सन्मानाची ७५ वर्षे पूर्ण करतोय. अशा स्थितीत वैचारिक बाबतीमध्ये एखाद्या नेत्याला विरोध करण्यासाठी अशी भूमिका घेणं, हे निंदनीय आहे.”
हेही वाचा- गोपीचंद पडळकरांवर चप्पलफेक; छगन भुजबळ संतापले, मराठा आरक्षणाचा उल्लेख करत म्हणाले…
याप्रकरणी छगन भुजबळ यांनीही एक्सवर (पूर्वीचं ट्विटर) पोस्ट लिहून या घटनेचा निषेध केला आहे. पोस्टमध्ये भुजबळ म्हणाले की, आमचा मराठा समाजाच्या आरक्षणाला विरोध नाही, विरोध आहे तो झुंडशाहीला व दादागिरीला! आज विधानपरिषद सदस्य गोपीचंद पडळकर यांच्यावर काही समाजकंटक लोकांनी विकृती दाखवून व लोकशाही पायदळी तुडवून हल्ला केल्याची बातमी समजली! या घटनेचा आम्ही सर्वजण तीव्र निषेध करतो! मी आजही इंदापूर येथे जाहीर सभेत सांगितलं आहे की ही दादागिरी थांबली नाही तर याला आम्ही जशास तसे उत्तर देऊ!
