दापोली : दापोली तालुक्यात गेल्या काही दिवसांपासून सुरू असलेल्या मुसळधार पावसामुळे आणि वादळसदृश्य परिस्थितीमुळे आंजर्ले-अडखळ खाडीत उभी असलेली ‘विघ्नहर्ता’ ही मासेमारी नौकेला जलसमाधीला मिळाली. यामुळे नौका मालक किसन लक्ष्मण कुलाबकर (रा. हर्णे) यांचे सुमारे १० लाखांचे नुकसान झाले आहे.
दापोली तालुक्यात पडणा-या मुसळधार पावसाने अक्षरशः थैमान घातले आहे. या पावसाचा फटका येथील किनारपट्टीला बसला आहे. आंजर्ले खाडीत ‘विघ्नहर्ता’ (आयएनडी- एमएच – ०४ एमएम ४८२) ही नौका उभी असताना पावसामुळे पाण्याचा प्रवाह अचानक वाढल्याने मोठा फटका बसला आहे. पाण्याच्या जोरदार प्रवाहामुळे नौका कलंडली व फुटली. तसेच आत पाणी शिरल्याने ती बोट पूर्णतः नष्ट झाली.
कुलाबकर यांची ही एकमेव नौका असून त्यावरच त्यांचे उपजीविकेचे साधन अवलंबून होते. “पारंपरिक मच्छीमार म्हणून कसाबसा हा उद्योग चालवत असताना अशा दुर्घटनेने आमचे भविष्यच प्रश्नचिन्हात आले आहे,” अशी खंत त्यांनी व्यक्त केली. या घटनेची पाहणी करून पंचनामा मत्स्यविभागाच्या परवाना अधिकारी दीप्ती साळवी यांनी केली आहे.
