दापोली : खेड भोस्ते घाटातील भीषण तिहेरी अपघात ; ८ जण जखमी

मिळालेल्या माहितीनुसार, संस्कृती संतोष कदम (वय – ४२), जागृती वैभव शिंदे (वय -३५), शोभा सदानंद कदम (वय -६०), संतोष एकनाथ कदम (वय -५१), मयुरी सदानंद कदम (वय- ३०), व जयराम वैभव सुर्वे (वय- १४ सर्व रा. मुंबई) अशी कार मधील जखमी झालेल्या प्रवाशांची नावे आहेत. तर ट्रक चालक राज शेखर मंगळी (वय २६), क्लिनर मल्लिकार्जुन काजी (वय ३२) अशी ट्रक मधील जखमी झालेल्यांची नावे आहेत. गोव्याहून मुंबईच्या दिशेने येणार्‍या सिमेंटच्या मोठ्या ट्रेलरने समोर चाललेल्या इर्टिगा कारला जोरदार धडक देऊन त्यानंतर भोस्ते घाटात नादुरुस्त झाल्याने महामार्गाच्या कडेला उभ्या असलेल्या ट्रकला धडक दिली. या अपघातात नादुरुस्त उभा ट्रक जवळपास २०० फूट खोल दरीत कोसळला. तसेच इर्टीगा गाडी ट्रेलरच्या धडकेने डिव्हायडर तोडून दुसर्‍या लेनमध्ये गेली. या दरम्यान समोरुन येणा-या दुचाकीला या मोटारींची धडक बसली.

वरील दोन्ही वाहनांना धडक दिल्यानंतर सिमेंटचा ट्रेलर देखील दरीत कोसळण्याच्या स्थितीत जाऊन अडकला. ट्रेलर मधील चालक आणि वाहक असे दोन जण जखमी झाले. घटनास्थळी पोलिसांनी धाव घेत दोन्ही लेनवरील वाहतूक धिम्या गतीने सुरू केली. सर्व जखमींना रुग्णालयात उपचारासाठी दाखल करण्या साठी श्री स्वामी समर्थ रुग्णवाहिका, नरेंद्र महाराज रुग्णवाहिका व १०८ रुग्णवाहिका यांनी मदत कार्य करत जखमींना कळंबणी उपजिल्हा रुग्णालयात दाखल करण्यात आले. या प्रकरणी रात्री उशिरापर्यंत खेड पोलीस ठाण्यात तक्रार दाखल करण्याचे काम सुरू होते.