कराड : शहर परिसरासह लगतच्या मलकापूर, कोयना वसाहत, कार्वेनाका येथे झालेल्या विविध घरफोड्यांच्या गुन्ह्यात कराड शहर गुन्हे प्रकटीकरण शाखेने यशवंत प्रकाश काटवटे (रा. आगाशिवनगर झोपडपट्टी, मलकापूर, ता. कराड) यास ताब्यात घेवून अटक केली आहे. त्याला कोठडीत ठेवण्याचे आदेश न्यायालयाने दिले आहेत. या कारवाईत यशवंत काटवटे याचेकडून १४ लाख ८० हजार रुपयांचे सोन्याचे दागिने हस्तगत करण्यात आले आहेत.
संशयिता सोबत या गुन्ह्यात एका अल्पवयीन मुलीचाही समावेश समोर आला असून, या अल्पवयीन मुलीला समज देऊन तिच्या पालकांच्या ताब्यात देण्यात आले आहे. याबाबत पोलिसांकडून मिळालेली माहिती अशी की, कराड शहर परिसरात फेब्रुवारी ते जुलै महिन्याच्या दरम्यान मलकापूर, कोयनावसाहत, कार्वेनाका आदी ठिकाणी जबरी घरफोडीचे गुन्हे झाले होते. त्याअनुषंगाने सहायक पोलीस निरीक्षक अशोक भापकर व त्यांच्या पथकाने या गुन्ह्यांमधील सीसीटीव्ही फुटेज, तांत्रिक विश्लेषण व गोपनीय बातमीदारांकडून मिळालेल्या माहितीच्या आधारे घरफोडीतील संशयित यशवंत काटवटे याला मलकापूर येथून ताब्यात घेतले आहे. यशवंत काटवटे याच्याकडे कसून चौकशी केली असता त्याने या घरफाड्या केल्याची कबुली दिली आहे.
पोलिसांनी यशवंत काटवटे याला अटक केली असून, त्याने चोरी केलेले साडेआठरा तोळे वजनाचे सोन्याचे दागिने पोलिसांनी हस्तगत केले आहेत. यशवंत काटवटे याचेकडून काही आणखी गुन्ह्यांची उकल होण्याची शक्यता पोलिसांनी वर्तवली आहे. पोलिसांनी त्याच्या सोबत असलेल्या अल्पवयीन मुलीला समज देवून तिच्या पालकांच्या ताब्यात दिले आहे.
दरम्यान, कराड शहर गुन्हे प्रकटीकरण शाखेने चालू महिन्यातील कामगिरी पाहता एकूण २७ तोळे सोन्याचे दागिने असा मुद्देमाल हस्तगत करून सहा घरफोडीच्या गुन्ह्यांची उकल केली आहे. तसेच कराड शहर परिसरातील गहाळ झालेले १२ लाख २० हजार रुपये किमतीचे ५१ भ्रमणध्वनी संच शोधण्यात पोलिसांना यश आले आहे.
