कराड : कराड शहर पोलीस ठाण्याच्या गुन्हे प्रकटीकरण शाखेने मलकापूर (ता. कराड) येथे कारवाई करत एका सराईत तरुण गुन्हेगारास अटक केली. त्याच्याकडून देशी बनावटीचे पिस्तूल व एक जीवंत काडतूस असा एकूण ६६ हजार रुपयांचा मुद्देमाल जप्त करण्यात आला आहे. न्यायालयाने त्यास न्यायालयीन कोठडीत ठेवण्याचे आदेश दिल्याचे सहायक पोलीस निरीक्षक अशोक भापकर यांनी सांगितले.
पोलिसांकडून याबाबत मिळालेली माहिती अशी की, जीवन शांताराम मस्के (३०, रा. शुक्रवार पेठ, कराड) असे अटक करण्यात आलेल्या सराईत गुन्हेगाराचे नाव आहे. याबाबत गुन्हे शाखेला गोपनीय माहिती मिळाल्यानंतर त्यांनी मलकापूर येथील छत्रपती शिवाजी चौकात सापळा रचला. या कारवाईत जीवन मस्के यास ताब्यात घेवून अटक करण्यात आली आहे. त्याच्याविरुद्ध कराड शहर पोलीस ठाण्यात पूर्वीही गुन्हे दाखल आहेत. पोलिसांनी त्याच्याकडून देशी बनावटीचे पिस्तूल व एक जीवंत काडतूस असा एकूण ६६ हजार रुपयांचा मुद्देमाल जप्त केला आहे.
पोलिसांकडून कराड शहर परिसरातील गुन्हेगारी प्रवृत्ती, टोळ्या आणि गट- तटांचा बंदोबस्त करण्यासाठी विशेष मोहिम राबविण्यात येत आहे. या मोहिमेंतर्गत ही यशस्वी कारवाई करण्यात आली. ही कारवाई पोलीस अधीक्षक तुषार दोशी, अपर पोलीस अधीक्षक वैशाली कडुकर, पोलीस उपअधीक्षक राजश्री पाटील आणि वरिष्ठ पोलीस निरीक्षक राजू ताशिलदार यांच्या मार्गदर्शनाखाली करण्यात आली. कारवाईत सहायक पोलीस निरीक्षक अशोक भापकर, फौजदार सतीश आंदेलवार यांनी महत्त्वाची भूमिका बजावली आहे.
