संगीतसूर्य केशवराव भोसले नाट्यगृहाची उभारणी गुणवत्तापूर्ण होईल – उदय सामंत

नाट्यगृहाच्या कामाची पाहणी, सोलर संयंत्र आणि मराठी चित्रपट प्रदर्शन सुविधेच्या उभारणीच्या सूचना

कोल्हापूर शहरातील नाट्य क्षेत्रातील रंगकर्मींसमवेत संगीतसूर्य केशवराव भोसले नाट्यगृहाच्या कामाची त्यांनी पाहणी केली. शासनाने नाट्यगृहाच्या पुनर्बांधणीसाठी दिलेल्या २५ कोटी रुपयांमधील कामांची पाहणी करीत महापालिकेला आवश्यक सूचनाही त्यांनी केल्या.

ते म्हणाले, हेरिटेज समिती तसेच नाट्य क्षेत्रातील अनुभवी तसेच नाट्य मंडळाच्या सूचनांचा समावेश नाट्यगृहाच्या उभारणीत करावा. यावेळी नाट्य क्षेत्रातील मिलिंद अष्टेकर, आनंद कुलकर्णी, सुनील घोरपडे, नाट्य परिषदेचे संचालक इतर रंगकर्मींसमवेत कोल्हापूर महानगरपालिकेचे अतिरीक्त आयुक्त रवीकांत आडसूळ, शहर अभियंता रमेश मस्कर, सहायक अभियंता सुरेश पाटील, मिलिंद पाटील, नाट्यगृह व्यवस्थापक समीर महाब्री आदी अधिकारी कर्मचारी उपस्थित होते.

मंत्री उदय सामंत यांनी व्यावसायिक रंगभूमीच्या निर्मात्यांना नाट्यगृह स्वस्त दरात उपलब्ध व्हावे आणि वीज खर्च कमी व्हावा यासाठी सोलर संयंत्र बसवणे आवश्यक आहे, असे नमूद केले. यामुळे व्यावसायिक रंगभूमीच्या निर्मात्यांना निर्मिती आणि सादरीकरणाच्या खर्चात समतोल राखता येईल, तसेच मराठी नाट्य निर्मितीला चालना मिळेल. सोलर संयंत्रामुळे नाट्यगृहाचे भाडेदर कमी करून ते सामान्यांना परवडेल अशा दरात उपलब्ध करून देता येईल, असेही ते म्हणाले.

केशवराव भोसले नाट्यगृह ही हेरिटेज इमारत असल्याने त्यावर सोलर पॅनल्स बसवण्याऐवजी बाजूला पुरेशी जागा शोधून त्यावर सोलर संयंत्र उभारण्याच्या सूचना त्यांनी दिल्या. कलादालनात सुरू असलेल्या सोलर प्रकल्पाची क्षमता वाढवून ती वीज नाट्यगृहातही वापरावी, असे त्यांनी सुचवले. तसेच, नाट्यगृहातील ग्रीन रूम अत्याधुनिक पद्धतीने तयार करावी आणि आसन क्षमता पूर्वीप्रमाणेच पुरेशी ठेवून ती उच्च दर्जाची असावी, याकडे विशेष लक्ष द्यावे, असे निर्देश त्यांनी दिले. बांधकामाव्यतिरिक्त आतमध्ये होणाऱ्या सुविधांमध्ये पडदे, प्रकाशयोजना, बसण्याची व्यवस्था यांसारखी अनुषंगिक कामे किमान ३० वर्षे टिकतील अशा गुणवत्तेची करावीत, अशी सूचनाही त्यांनी केली. याशिवाय, खासबाग मैदानाकडील रंगमंचही उच्च दर्जाने उभारून मोठ्या कार्यक्रमांसाठी पूर्वीप्रमाणेच त्याचा उपयोग करता येईल, यासाठी प्राधान्याने चांगल्या सुविधा निर्माण कराव्यात, असे ते म्हणाले.

नाट्यगृहात मराठी चित्रपटांचे प्रदर्शन

नाट्यगृहात इतर वेळी मराठी चित्रपट दाखवता यावेत यासाठी पांढरा पडदा आणि प्रोजेक्टरची व्यवस्था करण्यात येणार आहे. जेव्हा नाट्यगृहाला बुकिंग नसेल, तेव्हा नाममात्र दरात शालेय विद्यार्थ्यांसह चित्रपट प्रेमींसाठी मराठी चित्रपट दाखवण्याची सुरुवात लवकरच करावी, अशा सूचना मंत्री सामंत यांनी केल्या. मराठी भाषा, साहित्य आणि इतिहास सांगणारे सामाजिक चित्रपट विद्यार्थ्यांना दाखवल्यास त्यांना शिक्षणासह आपल्या संस्कृतीची ओळख होईल आणि मराठी चित्रपटसृष्टीबद्दल आवड निर्माण होईल. याचा भावी पिढीला फायदा होईल, असेही त्यांनी नमूद केले.