दिवाळी सुट्टीसाठी महाबळेश्वर सज्ज

वाई : दिवाळीसाठी महाबळेश्वर, पाचगणीसह साताऱ्यातील, कास आणि वासोटा आदी गिरीस्थळे पर्यटनासाठी सज्ज झाली आहेत.

पावसाचे सावट दिवाळी हंगामावर असले तरी वातावरण एकदम आल्हाददायक आहे. हॉटेल व्यावसायिक, वेण्णा लेकवरील घोडेसवारी करणारे छोटेमोठे व्यावसायिक उत्साहात आहेत. दाट धुके, बोचरी थंडी आणि निसर्गाचे विलोभनीय रूप पर्यटकांना साद घालत आहे.

पाचगणी, तापोळा, प्रतापगड, ऑर्थररसीट पॉईंट, केटस पॉईंट या ठिकाणी पर्यटकांची मोठय़ा प्रमाणात गर्दीची अपेक्षा आहे. पर्यटकांना सर्व सोयी सुविधा मिळाव्यात यासाठी पालिका प्रशासन सज्ज आहे. नेहमीप्रमाणे होणारी वाहतूक कोंडीची समस्या सोडविण्यासाठी पोलिसांची स्वतंत्र वाहतूक शाखा प्रयत्न करीत आहे. प्रसिद्ध पर्यटनस्थळ असलेले महाबळेश्वर सध्या दिवाळी सुटीमुळे फुलले असून, पर्यटकांची मोठी रेलचेल पाहावयास मिळत आहे. दिवाळी सुटीमुळे मोठय़ा संख्येने विविध राज्यातून पर्यटक महाबळेश्वरमध्ये दाखल होणार आहेत. यामध्ये गुजरातमधून आलेल्या पर्यटकांची संख्या अधिक आहे. पर्यटनास प्रसिद्ध क्षेत्र महाबळेश्वरसह सूर्यास्तासाठीचा प्रसिद्ध मुंबई पॉईंट या स्थळांवर पर्यटकांची गर्दी होणार आहे.

अंतर्गत असणारे रस्ते अतिशय खराब झाल्यामुळे पर्यटनासाठी आलेले पर्यटक आणि टॅक्सी व्यवसाय करणाऱ्यांना तारेवरची कसरत करावी लागत आहे. सध्या नौका विहारासाठी प्रसिद्ध वेण्णालेकला नौकाविहाराचा आनंद लुटताना पर्यटक पाहावयास मिळत आहेत. नौकाविहारासोबतच घोडेसवारी, गेम्स, स्ट्रॉबेरीपासून बनविलेली विविध खाद्यपदार्थ, गरमागरम मका कणीस यावर ताव मारताना पर्यटक पाहावयास मिळत आहेत. दिवाळी हंगामामुळे सलग आलेल्या सुट्टय़ांमुळे महाबळेश्वर गजबजून गेले आहे. वेण्णालेक येथे पर्यटकांना काही प्रमाणात वाहतूक कोंडीचा त्रास सहन करावा लागत आहे. स्वागतासाठी येथील मुख्य बाजारपेठा सजल्या असून, मोठय़ा प्रमाणावर पर्यटक खरेदीसाठी बाजारपेठेत येतात. बाजारपेठेतील प्रसिद्ध चप्पल, चणे, जाम खरेदीसाठी गर्दी होताना दिसत आहे. पालिकेच्या वतीने नूतन वाहनतळ तसेच ठिकठिकाणी पार्किंगची सोय करण्यात आली आहे. वेण्णालेकसह काही ठिकाणी वाहतूक कोंडीचा सामना पर्यटकांना करावा लागत आहे. मात्र पोलीस प्रशासन अधिक कुमक मागवून वाहतूक कोंडी सोडविण्यासाठी प्रयत्नशील आहे. येथील थंड हवामान, विपुल पर्जन्य, पर्यटनाच्या दृष्टीने सुखसुविधा, उच्च दर्जाची हॉटेल्स यामुळे पर्यटक मोठय़ा संख्येने आकर्षित होत आहेत.

दिवाळीला लागून आलेल्या ‘वीकएण्ड’मुळे पर्यटनप्रेमींना मोठा लाभ झाला असून, अनेक कुटुंबांनी आपला मोर्चा महाबळेश्वर पाचगणी कास पठार आदी पर्यटनाच्या विविध ठिकाणी वळविला आहे. पुढच्या शनिवार आणि रविवापर्यंत पर्यटकांची गर्दी राहणार आहे. यावेळी मुंबई, पुणे, गुजरात, दिल्ली बेळगाव आदी भागांतील पर्यटकांनी हॉटेलचे ऑनलाइन आरक्षण केले आहे.

कास हे जसे फुलांचे पठार आहे, तसे ते थंड हवेचे ठिकाण आहे. त्या ठिकाणी फक्त फुलांच्या मोसमामध्ये पर्यटक येतात असे गृहीत धरून नियोजन होत असे. परंतु आता कास पठार बारमाही पर्यटन स्थळ करण्याच्या अनुषंगाने प्रयत्नशील आहे. पर्यटकांना आकर्षित करण्यासाठी यावर्षी कास महोत्सव प्रायोगिक तत्त्वावर आयोजित करण्यात आला होता. पर्यटनवाढीसाठी स्थानिक, वन्यप्रेमी आणि नागरिकांचा सहभाग वाढविला जाईल. महाबळेश्वर पाचगणी प्रमाणे कास पठारावर बारमाही पर्यटनासाठी सातारा जिल्हा प्रशासन वन विभाग प्रयत्नशील आहे. साताऱ्यात पर्यटनाला मोठा वाव आहे. त्यामुळे पर्यटनवाढीसाठी प्रयत्न करण्यात येत आहे.

– रुचेश जयवंशी, जिल्हाधिकारी, सातारा.

महाबळेश्वरला या वर्षीच्या दिवाळी सुट्टीत मोठी गर्दी अपेक्षित आहे. त्या दृष्टीने पालिका प्रशासनाची तयारी सुरू आहे. पर्यटकांना सर्व सोयीसुविधा पुरविल्या जातील. यावेळच्या पावसाने निसर्ग एकदम चांगला आहे. पर्यटकांनी वाहतूक कोंडी होणार नाही अशा ठिकाणी वाहने उभी करू नयेत. इतर पर्यटकांना त्रास होईल असे वर्तन करू नये.

– पल्लवी भोरे-पाटील, मुख्याधिकारी तथा प्रशासक, महाबळेश्वर गिरीस्थान पालिका