राहुल नार्वेकरांचं उद्धव ठाकरेंना प्रत्युत्तर, ‘त्या’ टीकेबाबत म्हणाले, “माझ्यावर बेजबाबदार टीका करण्यामागे…”!

काय आहेत सर्वोच्च न्यायालयाचे आदेश?

राहुल नार्वेकरांकडून फेब्रुवारी महिन्यापर्यंत आमदार अपात्रतेसंदर्भात निकाल देण्यासाठी मुदत मागण्यात आली होती. मात्र, त्यानंतर लगेच लोकसभा निवडणुका लागत असल्याची बाब शिवसेनेकडून कपिल सिब्बल यांनी निदर्शनास आणून दिली. त्यानुसार न्यायालयाने शिवसेनेतील आमदार अपात्रतेच्या प्रकरणाचा निकाल ३१ डिसेंबरपर्यंत आणि राष्ट्रवादी काँग्रेसमधील आमदार अपात्रतेच्या प्रकरणाचा निकाल ३१ जानेवारीपर्यंत देण्याचे आदेश विधानसभा अध्यक्षांना दिले आहेत.

उद्धव ठाकरेंचा राहुल नार्वेकरांवर हल्लाबोल

दरम्यान, उद्धव ठाकरेंनी मंगळवारी मातोश्रीवर घेतलेल्या पत्रकार परिषदेत राहुल नार्वेकरांवर टीकास्र सोडलं होतं. “राहुल नार्वेकर म्हणतात त्यांना आदेशाची प्रत प्राप्त झालेली नाही. मी शिवसेनेच्या आमदारांना सांगेन की त्यांनी ही प्रत राहुल नार्वेकरांना नेऊन द्यावी”, असं उद्धव ठाकरे मंगळवारी म्हणाले होते.

राहुल नार्वेकरांचं प्रत्युत्तर

आपल्यावरील आरोप हे दबाव टाकण्याचा प्रकार असल्याचं राहुल नार्वेकर म्हणाले आहेत. “ज्यावेळी मला या आदेशासंदर्भात विचारलं गेलं, तेव्हा माझ्याकडे त्या आदेशाची प्रत नव्हती. ती संध्याकाळी अपलोड झाली. आता उद्धव ठाकरेंना ही प्रत आधी मिळाली असेल, तर त्याबद्दल तुम्ही त्यांनाच विचारा. आता उद्या सुनावणी असेल तेव्हा पुढील कार्यवाहीबाबत माहिती दिली जाईल”, असं राहुल नार्वेकरांनी स्पष्ट केलं आहे.

Video: “…तर मी आत्ता मोदींना भेटायला जातो”, उद्धव ठाकरेंनी दाखवली तयारी; ठेवली ‘ही’ अट!

“विधानसभा अध्यक्षांबद्दल बेजबाबदार टीका करण्यामागे एक मोडस ऑपरेंडी आहे. विधानसभा अध्यक्षांवर दबाव आणून आपल्याला हवा तसा निर्णय करून घेणं हा यामागचा हेतू आहे. पण मी अशा दबावाला बळी पडत नाही. त्यामुळे ज्यांना हा प्रयत्न करायचा आहे त्यांनी करावा”, अशा शब्दांत राहुल नार्वेकरांनी विरोधकांना सुनावलं आहे. “सर्वोच्च न्यायालयाने आदेश दिल्यानंतर संध्याकाळी ७ नंतर ती वेबसाईटवर अपलोड झाली. त्यानंतर ती मला मिळाली. त्यावरून अशा कमेंट्स केल्या जात आहेत. त्यांना जर आदेशाची प्रत इतरांपेक्षा आधी मिळाली असेल, तर त्यांनी तो खुलासा करावा. हेतुपुरस्सर केली जाणारी टीका म्हणजे फक्त दबाव टाकण्याचा प्रयत्न आहे”, असंही नार्वेकर म्हणाले.