Malegaon Bomb Blast Case Verdict Updates : मालेगाव बॉम्बस्फोट प्रकरणातून निर्दोष मुक्ततेनंतर प्रसाद पुरोहित यांची प्रतिक्रिया म्हणाले, “या देशाने मला…”

मालेगाव बॉम्बस्फोट प्रकरणात आज निकाल आलेला आहे, हा पूर्ण निकाल मला वाचता आलेला नाही पण प्राथमिक दृष्ट्या जे वाचलं त्यावरून सरकारी पक्षाला आरोपींवर संशयाच्या आधारावर दोषी सिद्ध करता आलेला नाही, अस कोर्टाने म्हटलेले आहे. आरोपींना बेनिफिट ऑफ डाऊटचा फायदा न्यायालयाने दिलेला आहे. सरकारी पक्षाला आरोप सिद्ध करता न येणे चिंताजनक आहे. मालेगाव स्फोट झाला त्यात ज्यांचा मृत्यू झाला, जे जखमी झाले त्यांना न्याय मिळालाच पाहिजे आणि या प्रकरणातील जे सूत्रधार आहेत त्यांच्यावर कारवाई झालीच पाहिजे. अमर शहीद हेमंत करकरे यांना देखील न्याय मिळाला पाहिजे. या स्फोटातील पीडितांना सरकारकडून न्यायची अपेक्षा आहे.

या स्फोटातील पीडितांना सरकारकडून न्यायची अपेक्षा आहे. पीडितांना न्याय मिळावा यासाठी सरकारने न्यायालयाच्या या आदेशाविरुद्ध अपील करावे..

मालेगाव बॉम्बस्फोट खटल्याचा निकाल आज लागला आहे या पार्श्वभूमीवर नाशिक ग्रामीण पोलीस यंत्रणा सज्ज झाली असून अतिरिक्त कुमक पोलिसांकडून मागविण्यात आली आहे कायदा व सुव्यवस्थेचा कुठलाही प्रश्न उपस्थित होऊ नये म्हणून मालेगावच्या भिकू चौकात विशेष खबरदारी घेण्यात आली असून दोन दिवसापासून संशयित व्यक्ती आणि गुन्हेगार प्रवृत्तीच्या लोकांसंदर्भात प्रिव्हेंटिव्ह ॲक्शन देखील घेण्यात आल्याची माहिती नाशिक ग्रामीण पोलीस अधीक्षक बाळासाहेब पाटील यांनी दिली आहे.

"मालेगाव येथे जी घटना घटली थी अप्रिय होती, सर्वांनीच त्याचा निषेध केला. जेव्हा न्यायपालिकेचा निर्णय येतो तो सर्वांनी स्वीकार केला पाहिजे. अखेर आपण आपल्या संविधानाअंतर्गत न्यायपालिकेला महत्त्व देतो. आपले संविधान हेही सांगते की आपण कोणालाही धर्म आणि जातीच्या आधारावर ओळखत नाही आपण त्यांन फक्त भारतीय म्हणून ओळखतो. त्यामुळे आज जो निर्णय आला आहे तो सर्वांनी स्वीकारला पाहिजे," अशी प्रतिक्रिया राष्ट्रवादी काँग्रेस (अजित पवार) पक्षाचे नेते खासदार प्रफुल्ल पटेल यांनी दिली आहे.

"मालेगाव बॉम्बस्फोट प्रकरणातील विशेष एनआयए न्यायालयाचा निकाल केवळ न्यायालयीन निर्णय नाही, तर तो एका दीर्घकाळ चाललेल्या राजकीय बदनामीच्या षड्यंत्राचा पर्दाफाश आहे. सर्व आरोपांमागे कोणताही ठोस पुरावा नाही, हे न्यायालयाने स्पष्टपणे नोंदवलं. पण याहून गंभीर बाब म्हणजे काँग्रेसनं जाणीवपूर्वक “हिंदू दहशतवाद” हा शब्दप्रयोग प्रचारात वापरत हिंदू समाजाला, श्रद्धेला, जगभरात बदनाम करण्याचा प्रयत्न केला. शतकानुशतकं मानवतेचं आणि सहिष्णुतेचं प्रतीक असलेल्या हिंदू धर्माला दहशतवाद्यांच्या रांगेत उभं करण्याचा अक्षम्य गुन्हा काँग्रेसने केला. आज कोर्टाने सत्य मांडलं, आता काँग्रेसनं हिंदू समाजाची माफी मागायला हवी! हिंदू कधीच दहशतवादी नव्हता आणि नसेलही न्यायालयाच्या आजच्या निर्णयाने हिंदूंना बदनाम करणाऱ्यांना मोठी चपराक मिळाली आहे," अशी पोस्ट भाजपाचे नेते चंद्रशेखर बावनकुळे यांनी केली आहे.

न्यायालयाच्या निकालाचं स्वागत सगळ्यांनी केलं आहे. पण न्याय मिळायला उशीर झालाय. देर आए, दुरुस्त आए. उशीरा का होईना, न्याय मिळाला आहे. तेव्हा देशात यूपीएचं सरकार होतं. देशात मोठ्या प्रमाणावर बॉम्बस्फोट होत होते. तेव्हा यूपीए सरकारचं म्हणणं होतं की दहशतवादाला कुठलाही रंग नसतो. पण मालेगाव बॉम्बस्फोट झाल्यावर सरकारने म्हटलं की हा भगवा दहशतवाद आहे. त्यात राजकारणाचा प्रयत्न केला. पण या प्रकरणाच्या राजकीयिकरणाला न्यायालयाने आजच्या निकालातून चपराक दिली आहे. भगवा दहशतवाद म्हणून हिंदुत्वाला या बॉम्बस्फोटाशी जोडलं गेलं.

जे घडलं ते दुर्दैवी आहे. आम्ही कोणत्याही दहशतवादाचं समर्थन करत नाही, करणारही नाही. न्यायव्यवस्थेवर आमता विश्वास आहे. दूध का दूध, पानी का पानी व्हायला पाहिजे, अशी प्रतिक्रिया राज्याचे उपमुख्यमंत्री एकनाथ शिंंदे यांनी दिली आहे.

बॉम्बस्फोट झाला तर आरोपी गेले कुठे? हा प्रश्न अनुत्तरीत राहिला आहे. जे दोषी असतील, ते पकडले गेले पाहिजेत. यासंदर्भात सरकार काय करणार? हादेखील प्रश्न आहेच. शहीद हेमंत करकरे यांनी या प्रकरणात जे काही धागेदोरे शोधले होते, त्यांचं काय झालं? या सरकारची ही जबाबदारी आहे की या स्फोटातील आरोपींना शिक्षा व्हायला हवी, अशी प्रतिक्रिया काँग्रेसचे प्रदेशाध्यक्ष हर्षवर्धन सपकाळ यांनी दिली आहे.

बॉम्बस्फोट झाल्याचे न्यायालयाने सिद्ध केले आहे. आम्ही या निर्दोष मुक्ततेला उच्च न्यायालयात अव्हान देऊ. आम्ही तात्काळ याचिका दाखल करू, असे पीडितांच्या कुटुंबाचे वकील शाहिद नदीम म्हणाले.

पुरावे न आढळल्याने एनआयएच्या विशेष न्यायालयाने मालेगाव बॉम्बस्फोट खटल्यामधून सर्व सातही जणांची निर्दोष सुटका केली आहे. पुराव्यांच्या आभावी ही निर्दोष मुक्तता करण्यात आली आहे.

२००८ च्या मालेगाव बॉम्बस्फोट प्रकरणातील आरोपी लेफ्टनंट कर्नल प्रसाद पुरोहित एनआयए न्यायालयात दाखल झाले आहेत. १७ वर्षे जुन्या बॉम्बस्फोट प्रकरणात विशेष एनआयए न्यायालय आज निकाल देणार आहे.