लोकसत्ता वार्ताहर
पंढरपूर : चैत्र गुढीपाडवा व मराठी नववर्षानिमित्त आज श्री विठ्ठल रुक्मिणी मंदिरात व गाभाऱ्यात विविध फुलांची आकर्षक सजावट करण्यात आली आहे. या फुलांच्या सजावटीसाठी शेवंती,अष्टर, गोंडा, गुलाब, जिप्सी या फुलांचा वापर करण्यात आला असल्याची माहिती श्री विठ्ठल रुक्मिणी मंदिर समितीचे व्यवस्थापक मनोज श्रोत्री यांनी दिली.मराठी नव वर्षाच्या पहिल्या दिवशी विठुरायाच्या दर्शनासाठी राज्यातून भाविक पंढरीत दाखल झाले आहे. फुलांच्या आरास आणि सणा निमित्त पोशाखामुळे सावळ्या विठुरायाचे लोभस रूप अधिकच खुलून दिसून आले आहे.
येथील श्री विठ्ठल रुक्मिणी मंदिरास आकर्षक फुलांची आरास करण्यात आली आहे. या साठी शेवंती २०० किलो, अष्टर ८० किलो, गोंडा १५० किलो, गुलाब १०० गड्डी, जिप्सी १० गड्डी या फुलांचा वापर करण्यात आला आहे. या फुलांच्या रंगसंगतीने आकर्षक सजावट करण्यात आली आहे. हि सजावट विठ्ठल भक्त नानासाहेब दिनकरराव पाचुंदकर पाटील रा. रांजणगाव महागणपती यांनी सेवाभावी तत्त्वावर मोफत केली आहे. या सजावटीचे काम श्री फ्लॉवर्स, पुणे यांनी केले आहे. यासाठी १५ कामगारांनी परिश्रम घेतले.
हिंदू नववर्षारंभ निमित्त राज्यातून भाविक दर्शनासाठी आले आहेत. यासाठी श्री विठ्ठल रुक्मिणी मंदिर समितीने दर्शन रांगेत विविध सोयी सुविधा देण्य आल्या आहेत. दर्शन रांगेत भाविकांसाठी उन्हाचा त्रास होऊ नये म्हणून पत्रा शेड व पायाखाली कार्पेट अंथरले आहे. तसेच पिण्याच्या पाण्याची व्यवस्था देखील करण्यात आली आहे. तसेच भाविकांची गर्दी विचारात घेऊन भाविकांचे जलद व सुलभ दर्शन होण्याच्या दृष्टीने ऑनलाइन दर्शन पास बुकिंग व्यवस्था बंद ठेवण्यात आली आहे. तसेच व्हीआयपी दर्शनावर निर्बंध, पुजेची संख्या कमी करणे व इतर अनुषंगिक उपाययोजना करण्यात समिती मार्फत करण्यात आल्या आहेत.
दरवर्षी चैत्री पाडव्याला आम्ही विठ्ठलाच्या दर्शनाला येतो. खूप समाधान वाटते असे जालना जिल्ह्यातील संतोष पवार यांनी सांगितले आहे.मंदिर परिसरात भाविकांची गर्दी दिसून येत आहे दरम्यान,प्रत्येक वर्षी महत्त्वाचे सण उत्सव, खास दिवस या निमित्ताने श्री विठ्ठल रुक्मिणी मंदिरात फुलांची आरास, सजावट केली जाते असे व्यवस्थापक श्रोत्री यांनी सांगितले. हिंदू नवीवर्षाच्या स्वागतासाठी विठ्ठल रुक्मिणी मंदिर सजले असून, मंदिरात आकर्षक फुलांची सजावट करण्यात आल्याने, विठुरायाचे सावळे रूप अधिकच खुलून दिसत आहे.
