Pankaja Munde : दसरा मेळाव्यात पंकजा मुंडेंचं वक्तव्य; म्हणाल्या, "गोपीनाथ मुंडेंनी मराठा आरक्षणाला विरोध केला नाही, पण आमच्या लेकरांच्या..."

पंकजा मुंडे यांनी दसरा मेळाव्यात मराठा आरक्षणाबाबत त्यांची भूमिका स्पष्ट केली.

Pankaja Munde speech at Dasara melava 2025 on obc maratha reservation Gopinath munde marathi news

Pankaja Munde Speech : विजयादशमीच्या निमित्ताने राज्यात आज विविध मेळाव्यांचे आयोजन करण्यात आले आहे. यातच भाजपाच्या नेत्या आणि मंत्री पंकजा मुंडे यांचा सावरगाव घाट येथे येथील भगवान गडावर वार्षिक दसरा मेळावा आयोजित करण्यात आला होता. यावेळी मोठ्या संख्येने जमसमुदाय दाखल झाला होता. यावेळी पंकजा मुंडे यांनी विविध विषयांवर भाष्य केले. सभेला संबोधित करताना पंकजा मुंडे यांनी मराठा आरक्षणावर देखील आपली भूमिका स्पष्ट केली. यावेळी त्यांनी भाजपाचे दिवंगत नेते गोपीनाथ मुंडेंनी मराठा आरक्षणाला पाठिंबा दिला होता, त्यामुळे आपणही मराठा आरक्षणाला पाठिंबा दिल्याचं पंकजा मुडे म्हणाल्या.

पंकजा मुंडे काय म्हणाल्या?

यावेळी पंकजा मुंडे म्हणाल्या की, “मी शपथ घेते की मुंडे साहेबांनी मला जो वसा दिला आहे तो वसा आणि वारसा… मी कधीही खाली मान घालायला लावणार नाही. सत्तेत बसलेली असेन किंवा विरोधात असेल, सामान्य मानसाचं हित माझ्या मनापासून कधीही दूर जाणार नाही.”

मराठा आरक्षणाच्या मुद्द्यावर बोलताना पंकजा मुंडे म्हणाल्या की, “पंकजा मुंडे गोपीनाथ मुंडेंचा वारसा चालवत असताना, प्रत्येक जाती-पातीच्या माणसासाठी लढणार आहे. काल आमचा बोऱ्हाडे धनगर आरक्षणासाठी तिथे बसला, दोन दिवस तुमची बहीण तिथे त्याच्यासाठी बसून राहिली. गोपीनाथ मुंडेनी मराठा आरक्षणाला समर्थन दिलं होतं, तेच आपणही मराठा आरक्षणाला समर्थन दिलं आहे. मराठा आरक्षणाला मुंडे साहेबांनी विरोध केला नाही, पण आमच्या लेकरांच्या ताटातलं घेऊ नका. येवढीच विनंती आम्ही केली आहे,” असे पंकजा मुढे पुढे भाषणात बोलताना म्हणाल्या.

हेही वाचा

“माझी मानसिकता इतकी वाईट झालेली…”, धनंजय मुंडेंनी भगवानगडावरून मांडली व्यथा; म्हणाले, “काहीही न करता शिव्या…”

“माझ्या मंचावर उपस्थित असलेल्या, निवडून आलेल्या मानसाच्या प्रचाराला गेले, त्याची कधी जात पाहिली नाही. जात पाहिली ती फक्त माणसाची जात पाहिली, कारण मी शिकलेच नाही जात पाहणं, भेदभाव करणं. कारण भगवान बाबांनी ते शिकवलं नाही. माझ्या बाबांनी ते शिकवलं नाही,” असेही पंकजा मुंडे म्हणाल्या.

दोन घास कमी घा, पण स्वाभीमानाने राहा. नका कोणाचे तुकडे उचलू. नका कोणाचे पैसे घेऊ, नका खोटी कामं-खोटे धंदे करू, नका गुंड पाळू, काही गरज नाही हे करण्याची. चांगल्या माणसाचं चांगलंच होतं. भगवान बाबांचे आशीर्वाद त्यांच्या पाठीशी असतात. मला तुमचा अभिमान आहे, असे आवाहनही पंकजा मुंडे उपस्थिताना म्हणाल्या.