राज ठाकरेंची साथ सोडणारा ‘पिट्या भाई’ अर्थात रमेश परदेशी कोण? काय आहे भाजपा प्रवेशाचा पॅटर्न?

रमेश परदेशी राजकीय वर्तुळात का चर्चेत आले?

रमेश परदेशी हे मनसे चित्रपट सेनेचे उपाध्यक्ष होते. काही दिवसांपूर्वी राज ठाकरे यांनी पुण्यातील पदाधिकाऱ्यांची आढावा बैठक घेतली होती. आगामी निवडणुका आणि पक्षबांधणीच्या कामात दिरंगाई करणाऱ्या पदाधिकाऱ्यांवर राज ठाकरे यांनी आपल्या आक्रमक शैलीत तीव्र नाराजी व्यक्त केली होती. याच बैठकीत राज ठाकरे यांनी ‘पिट्या भाई’ फेम रमेश परदेशी यांना थेट फटकारले. राज ठाकरे यांनी परदेशी यांना प्रश्न विचारला की, “तू छातीठोकपणे सांगतोस, संघाचा कार्यकर्ता आहेस, तर कशाला टाईमपास करतोस? एकाच ठिकाणी कुठे तरी राहा.” एकाच वेळी दोन वेगवेगळ्या विचारधारेसोबत न राहण्याचा स्पष्ट सल्ला त्यांनी दिला. मनसे चित्रपट सेनेच्या एका मोठ्या पदाधिकाऱ्याला राज ठाकरेंनी थेट सुनावल्यामुळे बैठकीत काही काळ तणावाची परिस्थिती निर्माण झाली होती. यानंतर काही दिवस रमेश परदेशी शांत होते. मंगळवारी त्यांनी भाजपात प्रवेश केला.

रमेश परदेशी भाजपा प्रवेशानंतर काय म्हणाले?

“सगळ्यांना जय महाराष्ट्र! मी बालपणापासूनच राष्ट्रीय स्वयंसेवक संघाचा स्वयंसेवक आहे. परंतू महाराष्ट्र नवनिर्माण सेना आणि राज ठाकरेंसह मागची २० वर्षे काम करत होतो. आत्ता बदलेली राजकीय स्थिती पाहता कलाकारांना, मराठी चित्रपटांना न्याय देण्यासाठी आणि माझ्यावर असलेले संघाचे संस्कार हे मला खुणावत होते. त्यामुळे मी जाहीर रित्या भाजपात प्रवेश केला आहे. भारताचे पंतप्रधान नरेंद्र मोदी कणखरपणे देश चालवत आहेत. त्याच प्रमाणे मराठी कलाकार, मराठी चित्रपटांचे प्रश्न आणि अडचणी सोडवण्याचं काम मी राज्य सरकारच्या मदतीने करेन. संघात जसं मानलं जातं की राष्ट्र प्रथम याच तत्त्वावर विश्वास ठेवून मी भाजपात प्रवेश केला आहे.”

मी राज ठाकरेंसह २२ वर्षे काम केलं आहे-परदेशी

मी संघाचा स्वयंसेवक आहे हे मी कधीही लपवलं नाही. मी राज ठाकरेंसह २२ वर्षे काम केलं. सोशल मीडियावर दसरा संचलनाचे माझे फोटो आहे. राज ठाकरेंनी मला सुनावलं वगैरे नाही. आम्ही सगळ्या गोष्टी खिलाडू वृत्तीने घेतो. संघाचे माझ्यावर संस्कार आहेत. बदलत असलेल्या परिस्थिती मला वाटलं की आपण आपल्या विचारांसह रहावं म्हणून मी भाजपात आलो आहे. माझी राज ठाकरेंबाबत किंवा मनसेबाबत कुठलीही तक्रार नाही. प्रश्न संस्कार आणि तत्त्वाचा आहे, संघ हा माझा संस्कार आहे. मला माझ्या संस्कारांनी सांगितलं की तू तुझ्या विचारांसह असलं पाहिजे त्यामुळे मी भाजपात आलो आहे. असं रमेश परदेशी यांनी म्हटलं आहे.

रमेश परदेशी कोण आहेत?

अभिनेते रमेश परदेशी यांनी चित्रपटांमधून अनेक वेगवेगळ्या भूमिका साकारल्या आहेत. त्यांनी पडद्यावर साकारलेला खलनायक अधिक गाजला. मात्र, त्यांना खरी ओळख मिळवून दिली ती ‘मुळशी पॅटर्न’ या चित्रपटाने. या चित्रपटात त्यांनी साकारलेली ‘पिट्या भाई’ ही भूमिका विशेष गाजली होती. या चित्रपटाने त्यांच्या आयुष्याला आणि करिअरला एक वेगळी दिशा मिळवून दिली. तेव्हापासून रमेश परदेशी हे रस्त्यावर दिसले तरीही लोक त्यांना पिट्या भाई अशी हाक मारायचे. प्रवीण तरडे यांनी लिहिलेला आणि दिग्दर्शित केलेला हा चित्रपट शेतकऱ्यांची व्यथा मांडणारा होता. रमेश परदेशी आणि प्रवीण तरडे हे दोघंही खूप चांगले मित्र आहेत. दरम्यान आधी रमेश परदेशी ‘रेगे’, ‘देऊळबंद’, ‘फत्तेशिकस्त’, ‘बेरीज वजाबाकी’ आणि अजय देवगण याच्या ‘सिंघम’ या चित्रपटांमध्येही काम केलं आहे.