रत्नागिरी– रत्नागिरी-गणपतीपुळे मार्गावर निवळी येथे सोमवारी सकाळी गॅस टँकरला अपघात होवून उलटला. यामुळे परिसरात चांगलीच खळबळ उडाली. या अपघातात जखमी झालेल्या चालकाला गाडीच्या बाहेर काढून तातडीने जिल्हा रुग्णालयात उपचारासाठी दाखल करण्यात आले.
मिळालेल्या माहितीनुसार, कोल्हापूरकडे गॅस घेऊन जाणारा टँकर (टी एन ८८ एल ९६६१) निवळी फाट्याजवळच्या वळणावर चालकाचे नियंत्रण सुटल्याने उलटला. यात चालक गंभीर जखमी झाला. मात्र हा टँकर रस्त्याच्या कडेला पलटी झाल्यामुळे येथील वाहतुकीवर कोणताच परिणाम झाला नाही. मात्र गॅसचा टँकर असल्यामुळे घटनास्थळी स्थानिकांनी धाव घेतली आणि मदतकार्य सुरू केले.
अपघाता नंतर गॅस गळतीचा कोणताही धोका नसल्याने या मार्गावरील थांबवण्यात आलेली वाहतूक काही कालावधीत नंतर पूर्ववत सुरू करण्यात आली. या अपघात ठिकाणी ग्रामीण पोलीस ठाण्याचे पोलीस निरीक्षक राजेंद्र यादव यांनी आपल्या पथकासह भेट देवून तपास कार्य सुरु केले आहे.
