रविकिरण तोरसकर यांचा भाजपमध्ये प्रवेश

नॅशनल मच्छीमार फोरमचे सदस्य, मच्छीमार नेते रविकिरण तोरसकर यांनी नुकताच मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला. पारंपरिक मच्छीमारावर पर्ससीन नेटधारकांकडून होणारा त्रास आणि परप्रांतीय ट्रॉलर्सधारकांच्या धुडगूसाविरोधात तोरसकर लढा देत आहेत. भाजपचे जिल्हाध्यक्ष प्रमोद जठार या वेळी उपस्थित होते. केंद्र व राज्यातील भाजप सरकार पारंपरिक व छोटय़ा मच्छीमारांचे प्रश्न सोडविण्यास कटिबद्ध आहे. रविकिरण तोरसकर यांच्या मच्छीमारांच्या प्रश्नावरील लढय़ात त्यांना सरकार निश्चितच सहकार्य करेल, अशी ग्वाही मुख्यमंत्र्यांनी दिली.
रविकिरण तोरसकर यांनी पारंपरिक मच्छीमारांच्या प्रश्नावर संघर्ष करतानाच परप्रांतीय ट्रॉलर्सधारकाविरोधातही संघर्ष केला आहे. त्यांच्या भाजपप्रवेशाने पारंपरिक, छोटय़ा मच्छीमारांना निश्चितच न्याय मिळेल, असा मच्छीमारांनी विश्वास व्यक्त केला आहे.