“मित्रपक्षावर तू काही बोलायचं नाही”, एकनाथ शिंदेंचा धंगेकरांना आदेश; माजी आमदार म्हणाले, “पक्षप्रवेशापासूनच…”

रवींद्र धंगेकर यांनी सांगितलं की त्यांच्या पक्षाच्या (शिवसेना) प्रमुखांनी म्हणजेच उपमुख्यमंत्री एकनाथ शिंदे यांनी त्यांना मित्रपक्षांवर टीका न करण्यास सांगितलं होतं. मात्र, पुणेकरांच्या प्रश्नांसाठी आवाज उठवत राहा अशा सूचनाही केल्या आहेत.

पक्षप्रवेशापासूनच उपमुख्यमंत्र्यांचा मला पाठिंबा : धंगेकर

रवींद्र धंगेकर म्हणाले, “पुणेकरांची भूमिका हीच माझी भूमिका आहे. मी जो काही लढा देत आहे. त्या लढ्यात आमच्या पक्षाच्या प्रमुखांनी मला कायम सहकार्य केलं आहे. त्यासाठी मी त्यांचे आभार मानतो. मी पक्षप्रवेश केल्यापासून आमचे नेते व उपमुख्यमंत्री एकनाथ शिंदे माझ्या पाठिशी आहेत. मी खरं बोलतो म्हणून ते मला पाठिंबा देतात. त्यांनी मला सांगितलं की तू मित्रपक्षांवर काही बोलायचं नाही. परंतु, पुण्यातील गुन्हेगारीविरोधात, पुणेकरांच्या प्रश्नांसाठी लढत राहा.”

“मी विरोधी पक्षांविरोधात बोलत नाही”

“पुण्यात बिल्डर लॉबी ज्या पद्धतीने काम करतेय, त्यांच्या अवतीभोवती राजकारणी लोक आहेत. राजकीय पदांची शक्ती वापरून पुणेकरांसमोर अडचणी निर्माण केल्या जात आहेत. मात्र, अन्याय करणाऱ्यांविरोधात बोलायला मला कोणी अडवलेलं नाही. उपमुख्यमंत्री एकनाथ शिंदे, मंत्री उदय सामंत माझ्या पाठिशी उभे आहेत. मी कधी कुठल्याही विरोधी पक्षाविरोधात बोलत नाही. मी केवळ एका प्रवृत्तीविरोधात बोलतो.”

माजी आमदार धंगेकर म्हणाले, “बिल्डरांनी पुण्यात सर्वसामान्यांचं जगणं अवघड केलं आहे. पुण्यात आपली नजर जाईल तिकडे पुढारी, मंत्री व बिल्डर लॉबीने वेढा घातला आहे. सगळीकडे भीतीचं वातावरण आहे. याविषयी मी पंतप्रधान नरेंद्र मोदी, केंद्रीय गृहमंत्री अमित शाह, मुख्यमंत्री देवेंद्र फडणवीस यांना पत्र लिहिलं आहे. यात लक्ष घालण्याची विनंती केली आहे. काही पुढारी व श्रीमंतांमध्ये सर्वसामान्यांना त्रास देण्याची प्रवृत्ती वाढली आहे.”