“आता मंदिरात पाण्याऐवजी वाइन….”; सदाभाऊ खोत ठाकरे सरकारवर संतापले

“राज्यातील महाविकास आघाडी ही मद्यविक्री विकास आघाडी आहे. शेतकऱ्यांच्या नावावर दुकानदारी खपवण्यासाठी वाईन विक्रीला परवानगी देण्याचा निर्णय घेतला गेला. आता गावातल्या दुधाच्या डेअरी बंद करा आणि वायनरी काढा,” अशी टीका सदाभाऊ खोत यांनी टीव्ही ९ मराठीशी बोलताना केली. पुढे ते म्हणाले की, “राज्य सरकारने साखर कारखान्यांमधील अंतराची अट काढून टाकावी, मग आम्ही समजेल की तुम्ही शेतकऱ्यांसाठी त्यांच्या हिताचा निर्णय घेत आहात. एसटी मधला कोट्यवधी रुपयांचा भ्रष्टाचार संपायला तयार नाही. कामगारांच्या मनात धास्ती आहे, लालपरी वाचणार नाही,” अशी भीतीही त्यांनी बोलून दाखवली.

दरम्यान, राज्य सरकारने सुपरमार्केटमध्ये वाइनविक्रीस परवानगी देण्याचा निर्णय घेतल्यानंतर विरोधी पक्षांकडून सातत्याने टीका सुरूच आहे. तर, यासंर्भात बोलताना वाईन आणि दारूत फरक असल्याचं उपमुख्यमंत्री अजित पवार म्हणाले होते. त्यावरून देखील त्यांच्यावर टीका झाली. “वाइन आणि दारू यात जमीन-आस्मानाचा फरक आहे. आपल्या राज्यातले अनेक शेतकरी वेगवेगळ्या प्रकारची फळं तयार करतात. द्राक्ष, काजूपासून वाइन तयार होते. अशी अनेक फळं आहेत. आपल्याकडे वाइन पिणाऱ्यांचं प्रमाण अतिशय अल्प आहे. जेवढी वाइन तयार होते, तेवढी आपल्या राज्यात खपत नाही. इतर राज्यांत आणि काही परदेशात निर्यात होते,” असं अजित पवार यांनी वाइनच्या व्यवसायासंदर्भात माहिती देताना सांगितलं होतं.