सांगली : पोलीस फौजदाराला दोन लाखांची लाच घेताना पलूसमध्ये अटक

याबाबत मिळालेली माहिती अशी, तक्रारदाराविरोधात पलूस पोलीस ठाण्यात फसवणुकीचा गुन्हा दाखल करण्यात आला होता. या गुन्ह्यात तक्रारदाराला पोलीस ठाण्यात बोलावून उपनिरीक्षक (फौजदार) गायकवाड यांनी अटक करण्याची भीती घातली. ती टाळण्यासाठी न्यायालयात अटकपूर्व जामीन घेण्याची संधी देतो, मात्र, यासाठी दहा लाख रुपये दे, अशी मागणी केली होती. यांपैकी दोन लाख रुपये दिल्यानंतर तक्रारदारास अटक न करता पाठविण्यात आले. दरम्यान, उच्च न्यायालयात अटकपूर्व जामीन मंजूर झाला. लाचखोर फौजदार गायकवाड याने तक्रारदारास पोलीस ठाण्यात बोलावून उर्वरित ८ लाख रुपयांची मागणी करत न दिल्यास फोरेक्स ट्रेडिंग अनुषंगाने चौकशी सुरू असून, यामध्ये आणखी एक गुन्हा दाखल करेन अशी धमकीही दिली. यानंतर तक्रारदाराने लाचलुचपत विभागाशी संपर्क साधून माहिती दिली.

तडजोडीअंती बुधवारी लाच म्हणून आणखी दोन लाख रुपये देण्याचे ठरले. या दरम्यान, लाचलुचपत विभागाचे उपअधीक्षक उमेश पाटील, पोलीस निरीक्षक विजय चौधरी, किशोर खाडे आणि प्रीतम चौगुले, अजित पाटील, उमेश जाधव, सलीम मकानदार, चंद्रकांत जाधव, सुदर्शन पाटील, पोपट पाटील, रामहरी वाघमोडे, सीमा माने, धनंजय खाडे आदींच्या पथकाने पलूस पोलीस ठाण्यात सापळा लावला. पोलीस ठाण्यातील कक्षातच दोन लाखांची लाच घेत असताना गायकवाड सापळ्यात अडकला.

गायकवाड विरोधात काल रात्री उशिरा पलूस पोलीस ठाण्यात भ्रष्टाचार प्रतिबंधक कायद्यानुसार गुन्हा दाखल करून अटक करण्यात आली. आज न्यायालयात हजर केले असता, त्याला एक दिवस कोठडीत ठेवण्याचा आदेश न्यायालयाने दिला असल्याचे उपअधीक्षक पाटील यांनी सांगितले.