Sharad Pawar : शरद पवार म्हणाले, “पक्ष उभा करायला अक्कल लागते, फोडायला…”

काय म्हणाले शरद पवार?

सध्या विधानसभा निवडणूक जवळ आली आहे. मी दिवसाला पाच ते सात सभा घेतो. लोकांना विचारलं की लोक सांगतात की पक्ष फोडाफोडी ही काही आम्हाला मान्य नाही. आमचं महाविकास आघाडीचं सरकार होतं. मुख्यमंत्री उद्धव ठाकरे होते, मंत्री होते अजित पवार, मंत्री होते एकनाथ शिंदे, छगन भुजबळही मंत्री होते, असं मंत्रिमंडळ असताना एकनाथ शिंदेंनी ४० आमदार गोळा केले, गोहत्तीला जाऊन बसले आणि उद्धव ठाकरेंचं सरकार पाडलं. सरकार पडलं आणि नवीन सरकार आलं. एकनाथ शिंदे मुख्यमंत्री झाले. आज काय अवस्था आहे बघा, असं शरद पवार ( Sharad Pawar ) यांनी म्हटलं आहे.

हे पण वाचा- Ajit Pawar : शरद पवारांसह राजकीयदृष्ट्या एकत्र याल का?, अजित पवार म्हणाले, “आमचं नातं..”

पक्ष फोडायला अक्कल लागत नाही, उभा करायला लागते-शरद पवार

पक्ष फोडणं हा आणि सत्ता हाती घेणं हा लोकशाहीचा मार्ग आहे का? अनेक ठिकाणी लोक मला सांगतात की पक्ष फोडणं हे काही मला मान्य नाही. देवेंद्र फडणवीस मध्यंतरी एके ठिकाणी म्हणाले की मी फार मोठं काम केलं, मी दोन पक्ष फोडले. पक्ष उभा करायला अक्कल लागते, कष्ट लागतात. पक्ष फोडायला अक्कल लागत नाही. या लोकांनी पक्ष फोडले. आज निवडणुकीत लोकसभेचा निकाल पाहिल्यानंतर या लोकांना चिंता वाटू लागली. त्यामुळे नवेनवे कार्यक्रम जाहीर केले, असं शरद पवार ( Sharad Pawar ) म्हणाले.

लाडकी बहीण योजना आणली पण सुरक्षेचं काय?

या सरकारने लाडकी बहीण योजना आणली. बहिणींना मदत केली तर माझी काही तक्रार नाही. पण प्रश्न मदतीपेक्षा दुसरा आहे. आज महाराष्ट्रात स्त्रियांवर होणारे अत्याचार. बदलापूरमध्ये दोन लहान मुलींवर अत्याचार झाले. असं ऐकायला मिळतं की महाराष्ट्रात गेल्या सहा महिन्यात ६०० हून अधिक महिलांचं अपहरण झालं आहे. महिलांची सुरक्षा हा प्रश्न महत्त्वाचा वाटत नाही का? असा सवाल शरद पवारांनी ( Sharad Pawar )भाषणात केला.