सुरत-चेन्नई ‘ग्रीन कॉरिडॉर’ मार्ग सोलापूरच्या ६१ गावांतून जाणार; सोलापूरसाठी बाह्यवळण मार्गही मंजूर

सोलापूर जिल्ह्यातून पुढे कर्नाटकात जाणाऱ्या ग्रीन कॉरिडॉरची लांबी १५१ किलोमीटर आहे. बार्शी तालुक्यात १८ गावे, ३६ किमी, उत्तर सोलापूर-८ गावे, २४ किमी, दक्षिण सोलापूर-१५ गावे, ४३ किमी आणि अक्कलकोट-२० गावे, ४८ किमी याप्रमाणे तालुकानिहाय ग्रीन कॉरिडॉर मार्गावरील गावे आणि त्याचे अंतर निश्चित करण्यात आले आहे.

सुरत-चेन्नई ग्रीन कॉरिडॉर महामार्ग अहमदनगर जिल्ह्यातून उस्मानाबाद जिल्ह्यातील परांडा तालुक्यातून (१२ गावे) पुढे सोलापूर जिल्ह्यातील बार्शी तालुक्यात येणार आहे. बार्शीतून पुन्हा उस्मानाबाद जिल्ह्यात तुळजापूर तालुक्यात (१८ गावे) हा महामार्ग जाऊन पुनश्च उत्तर सोलापूर, दक्षिण सोलापूर आणि अक्कलकोटमार्गे कर्नाटक राज्याला जोडला जाणार आहे. या ग्रीन कॉरिडॉरसाठी सोलापूर जिल्ह्यात येणाऱ्या गावांतील भूसंपादनाबाबत येत्या आठवडाभरात राजपत्र आणि नंतर अधिसूचना प्रसिद्ध होणार आहे. सहा महिन्यांत संपूर्ण प्रक्रिया पूर्ण होऊन भूसंपादन केले जाणार असल्याचा प्राथमिक माहिती उपजिल्हाधिकारी (भूसंपादन) अरुणा गायकवाड यांनी दिली.

याशिवाय सोलापूर शहरातील जड वाहतुकीमुळे होणारी कोंडी सुटण्यासाठी सुरत-चेन्नई ग्रीन कॉरिडॉरमधूनच बाह्यवळण मार्गही मंजूर झाला असून त्यासाठी भूसंपादनाची प्रक्रिया येत्या सहा महिन्यांत पूर्ण होण्याची अपेक्षा जिल्हाधिकारी मिलिंद शंभरकर यांनी व्यक्त केली आहे. यापूर्वी पहिल्या पुणे-सोलापूर महामार्गावरील केगाव ते हत्तूर हा २२ किलोमीटर अंतराचा बाह्यवळण मार्ग पुढे कर्नाटकातील विजापूरकडे जाण्यासाठी तयार झाला आहे. त्यानंतर २५ किलोमीटरचा हत्तूर ते तांदूळवाडी आणि ३५ किलोमीटरचा तांदूळवाडी ते केगाव हा बाह्यवळण मार्ग तयार होणार आहे. या माध्यमातून सोलापूर-पुणे, सोलापूर-हैदराबाद, सोलापूर-विजापूर आणि रत्नागिरी-नागपूर हे चारही महामार्ग सोलापूर शहराभोवतीच्या बाह्यवळण मार्गाला जोडले जाणार आहेत.