सोलापूर : तिहेरी खून खटल्यातून दोघा सख्ख्या बहिणींची निर्दोष मुक्तता

मूळ गुजरातचे असलेले रणछोड जाधव हे कुटुंबीयांसह मंगळवेढा रस्त्यावर ति-हे येथे सिद्धनाथ साखरजवळ वस्तीवर राहून दुग्ध व्यवसाय करायचे. यातील आरोपी काजल व रतन या दोघी बहिणींची लग्ने वडील रणछोड जाधव यांनी त्यांच्या इच्छेविरुद्ध ठरविली होती. काजल हिचे एका मुलाबरोबर प्रेमसंबंध असल्याचे कळल्यानंतर वडील रणछोड जाधव, आई हतयबाई, बहीण लाखी व भाऊ मफा यांनी तिला मारहाण व जाचहाट करायला सुरुवात केली होती.

हेही वाचा – “शिवसेनेचे बंडखोर उद्धव ठाकरेंकडे परत जातील, कारण…”, भाजपा खासदाराचा मोठा दावा!

दुसरी मुलगी रतन हिच्यावर चारित्र्याचा संशय घेऊन तिलासुद्धा मारहाण व्हायची. त्यामुळे काजल व रतन दोघी चिडून होत्या. घटनेअगोदर २४ तासांत या दोघींनी आई-वडील व भावंडांना उद्देशून तुम्हाला जिवंत सोडणार नाही, अशी धमकी दिली होती. ४ एप्रिल २०१८ रोजी वडील रणछोड जाधव हे गुजरात येथे गेले होते. याच संधीचा फायदा घेऊन काजल अणि रतन यांनी ६ एप्रिल रोजी भाऊ मफा (वय २१) व बहीण लाखी (वय २२) यांच्या डोक्यात पहारीने मारून खून केला व त्यानंतर बाहेर गेलेली आई हतयबाई (वय ५०) घरी आल्यानंतर तिचादेखील निर्दयपणे खून केला, असा सरकार पक्षाचा आरोप होता. खटल्याच्या न्यायालयीन सुनावणीवेळी आरोपींचे वकील जयदीप माने यांनी सरकार पक्षाचे आलेले पुरावे व जबाबांतील तफावती मांडल्या. सरकारतर्फे ॲड. एन. बी. गुंडे यांनी काम पाहिले.