Uddhav Thackeray : “देवेंद्र फडणवीस यांच्या खुर्चीवर अनेकांची वक्रदृष्टी, ते पंंचांग काढून…”; उद्धव ठाकरेंची टोलेबाजी

मी अभ्यास न करता दोन लाखांपर्यंत पीक कर्ज माफ केलं होतं-उद्धव ठाकरे

आपलं युतीचं सरकार आलं यांनी जाहीर केलं छत्रपती महाराज शेतकरी कर्जमाफी योजना आणली. मला कुणी ढ म्हणू द्या, अडाणी म्हणू द्या पण मी अभ्यास न करता दोन लाखांपर्यंतचं पीक कर्ज माफ केलं होतं. आता जे मुख्यमंत्री आहेत ते पंचांग काढून बसले आहेत. राहु कुठे आहे केतू कुठे आहे? ते बघत आहेत. त्यांच्या खुर्चीवर अनेकांची वक्रदृष्टी आहे. कालच बिहारमध्ये बसता बसता पडले, पडता पडता बसले तो भाग वेगळा. आता त्यांनी मुहूर्त काढला आहे पुढच्या वर्षीच्या जूनचा. जूनमध्ये कर्जमुक्ती करणार असतील तर आत्ताच्या कर्जाचे हप्ते भरायचे की नाही? कर्जमुक्ती होणार असेल तर हप्ते का भरायचे? सगळ्या कर्जाची माफी जूनमध्ये होणार आहे का? असे प्रश्न उद्धव ठाकरेंनी विचारले आहेत.

लाडकी बहीण योजनेत भांडणं लावण्याचं सरकारचं काम-उद्धव ठाकरे

लाडकी बहीण योजना आणली गेली आहे. खरंच सगळ्यांना लाभ मिळतो आहे का? निवडणुकीच्या आधी घरातल्या सगळ्या महिलांना मिळाली होती मदत आता कुटुंबातल्या दोनच महिलांना लाभ मिळतो आहे. याचा अर्थ घराघरांत भाजपा भांडणं लावत आहेत. मोहन भागवत म्हणत आहेत जास्तीत जास्त अपत्यं जन्माला घाला. मग एका घरात दोन बहिणी असतील, सासू असेल, सुना असतील, चार बहिणी असतील मग कुणाला लाडकी बहीण चे पैसे देणार? ज्यांना लाभ मिळतोय ती लाडकी आणि मिळत नाही ती नावडती? असे राज्यकर्ते असू शकत नाही. त्यांनी सगळ्यांना समान वागणूक दिली पाहिजे ते सरकारचं काम असतं असंही उद्धव ठाकरे म्हणाले.

जूनमधली कर्जमाफी म्हणजे कोपराला गूळ लावणं-उद्धव ठाकरे

जूनमध्ये कर्जमाफी जाहीर केली आहे म्हणजे कोपराला गूळ लावणं आहे. कोपराला गूळ लावला की तो चाटताही येत नाही आणि गूळ आहे म्हणून काढता येत नाही. जर सरकार दगाबाज असेल तर त्यांच्याशी दगाच केला पाहिजे. त्यांना सांगा आधी कर्जमुक्ती द्या मग आम्ही तुम्हाला मतं देऊ. माझा शेतकरी अन्नदाता आहे, कर्जमुक्ती केली तरच मतं देऊ. माझ्याकडे देवेंद्र फडणवीस यांचा व्हिडीओ आहे सरकार आल्यानंतर शेतकऱ्यांचा सातबारा कोरा कोरा कोरा आता कुठे गेलास रे चोरा? असं म्हणत उद्धव ठाकरेंनी देवेंद्र फडणवीस यांना टोला लगावला.