छत्रपतींच्या घराण्याने राष्ट्रवादी काँग्रेसला खूप काही दिले, परंतु राष्ट्रवादीने छत्रपतींना काय दिले याचा हिशेब राष्ट्रवादी देणार का? असा सवाल मुख्यमंत्री देवेंद्र फडणवीस यांनी सातारा येथे महाजनादेश यात्रेत केला. छत्रपतींचे घराणे देणारे घराणे आहे, ते घेणारे घराणे नसून त्यांनी तुमच्या पक्षाला खूप काही दिले आहे. तुम्ही त्यांना काय दिले याचा आधी हिशेब द्या. तुम्ही त्यांच्यावर केलेल्या आरोपांचे उत्तर जनताच तुम्हाला देईल, असे मुख्यमंत्र्यांनी सांगितले. मुख्यमंत्री देवेंद्र फडणवीस यांची महाजनादेश यात्रा सातारा येथे आली. यानंतर जाहीर सभा झाली. या वेळी उदयनराजे भोसले व शिवेंद्रसिंहराजे भोसले, प्रदेशाध्यक्ष चंद्रकांत पाटील उपस्थित होते.उदयनराजे व शिवेंद्रसिंहराजे भोसले हे कोणतीही अट ठेवून, वैयक्तिक कामे घेऊ न भाजपामध्ये आलेले नाहीत, तर त्यांनी फक्त जनतेची कामे सुचविली आहेत, असे मुख्यमंत्र्यांनी सांगितले.
